Руската Федерална служба за безбедност (ФСБ) денес соопшти дека спречила експлозија на гасовод во Серпуховскиот округ во Московската област, за која тврди дека ја планирале украинските разузнавачки служби.
Според соопштението, руски државјанин на возраст од 56 години бил уапсен „за време на обид да постави импровизирана експлозивна направа“ на дел од гасоводот, пренесува РИА Новости.
ФСБ наведува дека осомничениот, постапувајќи по инструкции од украински курир, овој месец купил возило и електрична бушалка, а потоа со добиени координати пронашол скриено складиште со рачно изработени експлозивни направи.
„По барање на украинските разузнавачки служби, требало да пробуши отвор над гасоводот, да ја активира и постави направата. По извршување на задачата, требало да замине во странство и да се врати во Украина преку трети земји“, соопшти ФСБ.
