Четиричлено семејство од Хамбург, кое пред две недели почина во Истанбул, било жртва на труење од инсектицид наменет за уништување креветни бубачки. Судско-медицинскиот преглед го потврди ова како причина за смртта, соопшти канцеларијата на јавниот обвинител што ја води истрагата.
Со ова, целосно се отфрла претпоставката дека трагедијата била предизвикана од труење со улична храна. Точниот тип на инсектицид не е наведен во официјалните документи.
Според Дојче Веле, истражителите во хотелската соба пронашле траги од фосфински гас – силно токсично соединение што се формира кога алуминиум фосфид ќе дојде во контакт со вода или влага. Фосфинот предизвикува оштетување на клетките, го нарушува транспортот на кислород во крвта и, во повисоки концентрации, може да доведе до сериозно кашлање, повраќање и оштетувања на црниот дроб и бубрезите.
Алуминиум фосфидот во Турција често се користи за дезинсекција во земјоделски постројки и магацини, но неправилната употреба во затворени простории, како хотелски соби, може да биде смртоносна. Истрагата продолжува за да се утврди одговорноста за трагичниот настан.
