Индија се подготвува да предложи купување руски борбени авиони и напредни противвоздушни системи за време на посетата на рускиот претседател Владимир Путин, која е најавена за следната недела, објави „Блумберг“ повикувајќи се на неименувани извори.
Путин треба да престојува во Индија од 4 до 5 декември, на 23. годишен самит меѓу двете земји, во период на очигледно заладување на односите меѓу Њу Делхи и САД. Според изворите на „Блумберг“, двете држави ќе разговараат за можната набавка на борбени авиони од петта генерација Су-57, како и за напредниот противвоздушен систем С-500.
Овој чекор следи по засилениот притисок од страна на американскиот претседател Доналд Трамп, кој годинава ја повика Индија да го намали увозот на руска нафта. Во јули, Вашингтон воведе казнена царина од 25% врз индискиот извоз, со што вкупната царинска стапка за Индија се искачи на 50%.
И покрај напнатите односи, индискиот премиер Нарендра Моди продолжува да го балансира традиционалното партнерство со Русија и соработката со САД и Европа. Иако Москва останува нејзин најголем снабдувач со оружје, уделот на руското вооружување во индискиот увоз се намалил на 36% во последните четири години, за разлика од периодот 2010–2014 кога изнесувал 72%, покажува извештајот на Стокхолмскиот меѓународен институт за истражување на мирот.
Индискиот министер за одбрана Ражеш Кумар Сингх неодамна истакна дека односите со Русија остануваат стратешки важни. „Русите ни беа пријатели и во добри и во лоши времиња. Нашата одбранбена соработка не престанува, но Индија води политика на стратешка автономија“, рече тој во Њу Делхи.
Индија веќе располага со повеќе од 200 руски борбени авиони и неколку батерии од системот С-400, кои ги користеше и за време на четиридневниот конфликт со Пакистан во мај.
