Според мониторингот на здружението за меѓународна младинска соработка ИНТЕРАКТИВ – Битола, во текот на изборната кампања за Локалните избори 2025 година не се забележани сериозни случаи на злоупотреба на административни ресурси.
Извештајот опфаќа периодот од 15 септември до 19 октомври и констатира дека политичката трка во Битола се водела во динамична и конкурентна атмосфера, со активни кампањи на ВМРО-ДПМНЕ и СДСМ, но без користење јавни ресурси за партиски цели. Не биле регистрирани случаи на користење службени возила, вклучување јавни службеници во партиски активности во работно време, ниту отворање инфраструктурни проекти со изборни мотиви.
Дел од партиските настани биле организирани во или во близина на јавни објекти, но пристапот бил еднаков за сите, без селективни привилегии. Функционерите што присуствувале се појавувале во својство на партиски претставници или како приватни лица.
Општинската администрација професионално ги извршувала своите надлежности, а комуникацијата на општината на социјалните мрежи останала во рамки на редовни административни информации.
Мониторингот е дел од национална иницијатива за следење на евентуална злоупотреба на административни ресурси и е поддржан од ИФЕС (Меѓународна фондација за изборни системи), која работи на унапредување на демократските процеси и промовирање на фер изборни практики во Северна Македонија.
