Основното јавно обвинителство Кавадарци поднесе обвинение против три лица за упатени закани кон градоначалникот Митко Јанчев и неговото семејство. Како што информираат од обвинителството, случајот се води за кривичното дело загрозување на сигурноста согласно член 144 од Кривичниот законик, а за првообвинетиот дополнително се бара притвор.
Првообвинетиот, кој поседува македонско и бугарско државјанство, се товари и за ширење расистички и ксенофобичен материјал преку компјутерски систем, по член 394-г. Тој подолг период на својот профил на Фејсбук објавувал содржини со говор на омраза, навреди, повици за насилство и директни закани кон градоначалникот Јанчев. Објавувал и фотографии од Јанчев и неговите малолетни деца, а заканите ги поткрепувал со видеа во кои пука со автоматска пушка и пиштол.
Од јули годинава, според обвинителството, започнал и телефонски да стапува во контакт со градоначалникот, испраќајќи закани лично и преку пораки.
Второобвинетиот, исто така, телефонски пренесувал дел од заканите во име на првообвинетиот, додека третиот обвинет коментирал на социјалните мрежи, упатувајќи закани за убиство кон Јанчев.
Од ОЈО Кавадарци најавуваат дека истрагата продолжува, а судот треба да одлучи по барањето за притвор на првоосомничениот.
