Аеродромот во Вилнус, главниот град на Литванија, денеска повторно ги прекина сите операции поради појава на сомнителни балони во воздушниот простор. Инцидентот е најновиот во серијата прекини што ја погодија балтичката земја во последните два месеци.
Според Ројтерс, аеродромот во Вилнус од почетокот на октомври бил затворен најмалку десет пати поради идентични причини. Литванските власти претходно соопштија дека по масовната појава на метеоролошки балони во октомври било утврдено дека шверцери ги користат за незаконски транспорт на цигари.
Вилнус ја обвини Белорусија и претседателот Александар Лукашенко дека дозволуваат ваква практика, оценувајќи ја како форма на „хибриден напад“ врз земјата. Летови ќе останат суспендирани сè додека воздушниот простор не биде целосно ослободен и проверен.
