НП Пелистер ја заврши изградбата на нова велосипедска и пешачка патека што го поврзува село Цапари со Националниот парк, потврди директорот Иванчо Тошевски за АПЛА.
„ЈУНП Пелистер роденденот го одбележува со голема работна акција за пробивање, расчистување и уредување на патеката. Таа е долга 4 километри, со висинска разлика од 500 метри, и ќе биде дел од кружен систем на патеки кои ќе ги поврзуваат Цапари и Ротино со НП Пелистер“, истакна Тошевски.
Работите беа изведени со поддршка на локалното население, планинари и велосипедисти од EXTREME BIKE TEAM Битола. Активностите по повод роденденот на Националниот парк продолжуваат во понеделник со работна средба на сите четири Национални паркови во Инфоцентарот на Пелистер.
