Бројот на жртви од поплавите и лизгањата на земјиштето на индонезискиот остров Суматра, предизвикани од обилни дождови и циклон, достигна 303, а уште 279 лица се водат како исчезнати, соопшти националната агенција за катастрофи. Претходните процени говореа за 174 загинати.
Големи делови од Индонезија, Малезија и Тајланд веќе една недела се зафатени од екстремни врнежи. Околу 80.000 жители на Суматра се евакуирани, јавува Ројтерс. Спасувачките тимови со хеликоптери доставуваат храна и неопходни материјали до најпогодените северни региони, каде што патиштата се уништени, а комуникациската мрежа е прекината поради бројни свлечишта.
Тешки поплави го погодија и јужен Тајланд. Локалните власти соопштија дека животите ги загубиле 162 лица во седум провинции, од кои најмногу во Сонгхла — 126 жртви.
Во меѓувреме, Шри Ланка се соочува со сопствена криза: поплави и свлечишта усмртија најмалку 123 лица, а десетици илјади граѓани се принудени да ги напуштат своите домови.
Научниците предупредуваат дека ваквите екстремни временски настани стануваат сè почести и поразорни како последица на климатските промени.
