На светските берзи минатата недела се забележа значителен раст на цените на акциите, пред се поради закрепнувањето на технолошкиот сектор и очекувањата дека американската централна банка ќе ги намали каматните стапки во декември.
На Волстрит, индексот Дау Џонс се искачи за 3,2% на 47.716 поени, S&P 500 порасна за 3,7% на 6.849 поени, додека Насдак регистрираше раст од 4,9% на 23.365 поени. Растот е поттикнат од опоравувањето на акциите на технолошките компании, кои претходно бележеа остар пад.
Инвеститорите се надеваат дека Федералните резерви ќе ги намалат каматните стапки за 0,25 процентни поени, како што направија во септември и октомври, што го зголеми оптимизмот на пазарот. Последните економски податоци покажуваат забавување на растот на американската економија, па повеќе претставници на централната банка сигнализираат дека се подготвени за дополнително намалување на каматните стапки. Сега пазарот проценува околу 85% веројатност за вакво намалување во декември.
Во Европа, цените на акциите исто така пораснаа. Лондонскиот индекс ФТСЕ се искачи за 1,9% на 9.720 поени, DAX во Франкфурт порасна за 3,2% на 23.836 поени, а парискиот CAC забележа раст од 1,8% на 8.122 поени. Индексот STOXX 600 на водечките европски акции регистрираше скромен пораст во ноември.
Минатиот месец беше нестабилен за индексите, особено поради падот на технолошкиот сектор на почетокот на ноември, но завршницата на месецот донесе значително закрепнување.
