Од утре официјално стартува системот „Безбеден град, безбедна држава“, кој автоматски ќе регистрира сообраќајни прекршоци преку камерите на „Сејф сити“. До крајот на годината ќе трае пробен период во кој возачите ќе добиваат само предупредувања, додека санкциите ќе бидат целосно активни од јануари, пренесе 4NEWS.mk.
Портпаролот на МВР, Гоце Андреевски, најави нулта толеранција кон сите прекршоци – и во населени места и на автопат. Сопствениците на возила ќе добиваат СМС и е-пошта со записник и платен налог. Во првите осум дена ќе може да се плати половина од казната, а по истекот – целосниот износ.
Во почетната фаза системот ќе регистрира пречекорена брзина, минување на црвено светло, возење без важечка сообраќајна дозвола и непрописно паркирање. Во следната фаза ќе бидат додадени и други типови прекршоци.
Камери веќе се поставуваат во Скопје, Тетово, Куманово, како и на автопатите и експресните патишта на коридорите 8 и 10. До средината на 2026 година системот треба да ја покрива целата држава. Од МВР очекуваат првите резултати да бидат забележливи во наредните недели.
