Српскиот претседател Александар Вучиќ денеска изјави дека не ја разбира логиката на Соединетите Американски Држави во врска со санкциите врз Нафтената индустрија на Србија (НИС) и дека не очекува Вашингтон да ја промени својата одлука за издавање лиценца за увоз на сурова нафта. Без оваа лиценца, рафинеријата во Панчево може да престане со работа, предупреди Вучиќ.
Рафинеријата НИС, која е дел од рускиот енергетски сектор и под санкции на САД, остана без сурова нафта за преработка. Енергетските експерти предупредуваат дека прекинот на работата може да предизвика скап увоз на нафтени деривати и синџирно зголемување на цените и инфлација.
Од воведувањето на санкциите, американските власти постојано нагласуваат дека не сакаат руската сопственост во НИС и дека таа „мора да биде нула“. Претходно, Србија се потпираше на Хрватска за увоз на нафта преку нафтоводот Јанаф, но протокот преку оваа рута е исто така прекинат.
Вучиќ истакна дека санкциите се насочени кон исклучување на руското управување и сопственост, што според него „не е засновано на меѓународното право“. Тој додаде дека Србија има рок од 50 дена да најде нов купувач за НИС, а во меѓувреме се разгледуваат опции за промена на сопственоста, вклучително и понудата од унгарскиот МОЛ.
„Ние сме мала земја и не можеме да функционираме без нафта. Не ја разбирам логиката на Американците и затоа ја повикувам меѓународната заедница да ги разбере последиците од санкциите“, рече Вучиќ, додавајќи дека и покрај критиките од Вашингтон, Брисел и Москва, останува горд на својата позиција.
