Република

Коњановски ја потпиша декларацијата за нула жртви во сообраќајот

Општините имаат клучна улога во унапредувањето на безбедноста во сообраќајот, а нивната соработка со централните институции е неопходна за поефикасни превентивни политики и мерки. Тоа беше главната порака на Националната конференција „Безбедност на сообраќајот во локална самоуправа“, што денеска се одржа во Скопје, на која учествуваше и градоначалникот на Битола, Тони Коњановски.

Конференцијата беше организирана од Републичкиот совет за безбедност на сообраќајот на патиштата, со поддршка од Министерството за внатрешни работи, Министерството за транспорт и врски и Заедницата на единиците на локална самоуправа. На настанот се обратија првите луѓе на институциите, нагласувајќи ја важноста на координираните активности.

Посебно внимание беше посветено на темите поврзани со урбанистичкото и сообраќајното планирање. Проф. д-р Јасмина Буневска-Талевски од Техничкиот факултет во Битола говореше за влијанието на овие процеси врз безбедноста на сообраќајот на локално ниво, додека проф. д-р Зоран Јошевски, член на Републичкиот совет, презентираше анализи за управувањето со сообраќајната безбедност во општините.

Битола, како општина која моментално работи на нов Генерален урбанистички план и нови сообраќајни решенија, веќе има изработено и студија за „Сејф сити“, која поставува основа за системско подобрување на безбедноста.

На конференцијата градоначалникот Коњановски го стави својот потпис на Декларацијата за безбедност во сообраќајот на патиштата, во која се нагласува дека ниту еден изгубен живот или сериозна повреда во сообраќајот не смее да биде прифатлива. Со тоа, Општина Битола се обврза активно да го промовира и применува „Сејф сити“ пристапот за создавање побезбеден сообраќаен систем.

Република

Планирани прекини на струја утре во Тетовскиот регион

Повеќе населени места во Полошкиот регион утре ќе останат без струја поради изведување планирани технички зафати на електро-системот.

Во Тетово, прекинот е најавен за 5 декември од 06:00 до 06:30 часот и ќе ги опфати делови од село Челопек, целите села Милетино и Блаце, како и индустриските објекти во Челопек.

Во Групчин, електричната енергија ќе биде исклучена на 5 декември во периодот од 09:00 до 14:30 часот, а прекинот ќе го зафати дел од селото.

Истовремено, жителите на Селце ќе останат без струја од 09:00 до 14:00 часот, при што прекинот ќе важи за делови од населеното место.

Од надлежните апелираат граѓаните навреме да се прилагодат на најавените технички активности.

Република

Тетовските цариници спречија обид за увоз на 2000 кг фалсификат прашок за перење штетен за здравјето и животната средина

Царински службеници од ЦИ Тетово спречија обид за криумчарење на 2000 килограми фалсификат прашок за перење алишта со трговска марка Ариел, кој бил натоварен во Турција и наменет за увозник од Скопје. Станува збор за 200 вреќи од по 10 кг, кои ги повредуваат правата од интелектуална сопственост.

Одделението за нетарифни мерки и заштита на правата од интелектуална сопственост при Царинската управа го извести правниот застапник на носителот на правото, кој потврди дека прашакот е фалсификат и се согласи за уништување на стоката.

Против сторителот по завршување на постапката ќе биде поднесена соодветна пријава.

Царинските службеници истакнуваат дека секојдневните заложби во сузбивање на нелегалната трговија и шверцот се клучни за заштита на здравјето на граѓаните, како и за спречување на загадување на животната средина предизвикано од неконтролиран хемиски состав.

Република

Битола го отвора најголемиот зимски фестивал во Македонија – Зимска Приказна 2025/2026

Од 20 до 31 декември, Битола повторно ќе се преобрази во светлечка зимска бајка со осум локации полни со празнична магија. Од Плоштадот Магнолија, преку Широк Сокак, Офицерски и Пациото на музејот, па сè до Старата чаршија и Пелистер, градот ќе се претвори во голема сцена на култура, музика и улична уметност.

На посетителите им се подготвуваат детско кино под отворено небо, живи концерти, DJ сетови, зимски базар и гастрономски изненадувања, како и светлечки инсталации што ја нагласуваат архитектурата на Битола. Секоја локација ќе нуди различна атмосфера, создавајќи празнична целина што ги опфаќа сите генерации – од децата што веруваат во чудо, до семејствата и младите кои го бараат ритамот на градот.

Организаторите потенцираат дека Зимска Приказна не е само фестивал, туку празнична приказна што ја живее целата заедница, а оваа година Битола ветува уште посветла и повесела атмосфера за сите свои посетители.

Добредојдовте во Зимска Приказна на прагот на 2026 година!