Магазин

Ова село во Европа ќе ви плати да живеете во него – до 100.000 евра на располагање

Регионот Трентино, на северот од Италија, спроведува нова програма за оживување на селата кои се соочуваат со целосно исчезнување, нудејќи значајна финансиска поддршка за оние што ќе купат и обноват недвижности во овие средини, објави 4NEWS.mk.

Преку програмата, заинтересираните можат да добијат до 20.000 евра за купување имот и дополнителни 80.000 евра за негово реновирање. Финансиската конструкција дополнително покрива до 40% од вкупните трошоци за купување и обнова на стара куќа. Единствен услов е новиот сопственик да живее во имотот најмалку десет години – во спротивно средствата ќе мора да ги врати. Како алтернатива, дозволено е недвижноста да се изнајмува во период од десет години, но парите не можат да се користат за куќи што ќе се издаваат краткорочно или за туристички цели.

За периодот 2025–2026 на располагање се ставени вкупно 10 милиони евра, како дел од пошироката државна иницијатива за оживување на помали места со помалку од пет илјади жители. По првиот циклус на пријави, вториот е веќе отворен и ќе трае до 31 декември на пладне.

Програмата опфаќа повеќе планински и рамничарски населби што се слабо или целосно ненаселени, меѓу кои Вал ди Нон, Вал ди Соле, Вал ди Фиеме, Вал ди Чембра, Валфлоријана, Кастело Тезино, Валларса, Вермилјо и уште многу други. Пријавувањето е отворено за сите – италијански државјани од земјата и дијаспората, странци, како и поединци што сакаат да купат и обноват една до три станбени единици.

Недвижностите мора да бидат во станбена категорија, да не спаѓаат во луксузни класи и да се наоѓаат во згради со најмногу осум станови. По поднесување на пријавата, надлежните одлуката ја носат во рок од 90 дена, а исплатата следува околу 60 дена по одобрувањето.

Програмата покрива широк спектар на работи – од обнова на подови и инсталации, преку внатрешна столарија, па сè до покриви, фасади, балкони, надворешни скали, како и технички трошоци до 10% од целокупната инвестиција.

Магазин

Евровизија 2026 во Израел доби зелено светло, но четири земји веќе најавија бојкот

Најголемиот европски музички спектакл е погоден од невидена политичка бура, која ја доведува во прашање неговата иднина. Откако Европската радиодифузна унија (ЕБУ) му даде „зелено светло“ на Израел да настапи во 2026 година, четири земји – Ирска, Шпанија, Холандија и Словенија – официјално објавија бојкот на натпреварот!

Одлуката беше донесена на Генералното собрание на ЕБУ, каде што членките не гласаа за исклучување на Израел, туку усвоија нов пакет правила за наводна „заштита на интегритетот и неутралноста“ на натпреварот. Овој маневар, кој практично го задржа Израел во игра, го предизвика гневот на неколку јавни сервиси.

Ирска (рекордерот по победи!), шпанската РТVE, холандскиот Авротрос и словенечкиот РТВСЛО го спроведуваат своето претходно ветување. Тие едногласно сметаат дека учеството на Израел, во услови на војна во Газа и хуманитарна катастрофа, е некомпатибилно со мисијата и јавните вредности на медиумите!

Холандија се огласи за нејзиното учество на Евровизија: „во сегашните околности е некомпатибилно со јавните вредности што се важни за нас“. Шпанија оди до крај, РТVE не само што се повлекува, туку најавува дека нема да ги емитува ниту финалето, ниту полуфиналните вечери во 2026 година!

Бојкотот е мотивиран од двоен фронт: хуманитарната трагедија во Газа и сериозни сомнежи за злоупотреба на Евровизија за политички цели! Јавните сервиси зборуваат за притисоци, несразмерни кампањи и нефер практики во гласањето, а новите правила на ЕБУ ги сметаат за недоволни за враќање на довербата.

Додека едни бојкотираат, други силно ја поддржуваат одлуката на ЕБУ. Германија претходно предупреди дека ќе ја преиспита својата улога ако Израел биде исклучен. Овие земји инсистираат дека натпреварот мора да остане исклучиво културна арена, осудувајќи го бојкотот како непотребно политизирање.

Со повлекувањето на четири големи земји, вклучувајќи ја и моќната Ирска, и најавата за медиумски бојкот на преносите, ова е најсериозниот потрес за Евровизија во последните децении! Наместо да ја слави својата 70-годишнина со еуфорија, натпреварот во 2026 година започнува во сенка на длабоки поделби, прашања за интегритетот на гласањето и жешка дебата – дали е воопшто можно да се одвои културата од политиката кога во позадина беснее војна?!

Магазин

Русија го забрани Snapchat – Ова се причините

Рускиот регулатор за комуникации Роскомнадзор го блокира пристапот до Snapchat, апликацијата за привремено споделување фотографии и видеа, објави државната новинска агенција РИА.

Властите наведуваат дека една од причините за забраната е наводната злоупотреба на Snapchat „за организирање и извршување терористички акти и за регрутирање сторители“ во земјата.

Оваа одлука следува по слични ограничувања на други странски технолошки платформи, вклучително FaceTime на Apple, YouTube на Google, WhatsApp и Telegram на Meta, како дел од засилената кампања на Русија против апликации за кои властите тврдат дека се користат за криминални активности.

Магазин

Четири нови животи: Тројца браќа станаа татковци во ист ден

Тројца браќа од Израел доживеале редок и емотивен момент откако нивните сопруги родиле вкупно четири бебиња во еден ден. Среќниот настан се случил во вторник во медицинскиот центар „Мајанеи Хајешуа“ во Бнеи Брак, во близина на Тел Авив.

Бебињата се родиле во интервал од неколку часа, а меѓу нив има и пар близнаци, што значи дека семејството за еден ден добило четири нови членови.

Портпаролката на болницата за германската новинска агенција ДПА го опиша повторното обединување на тројцата браќа во породилното одделение како „посебен и изненадувачки момент“.

„Никаква статистика не можеше да нè подготви за овој уникатен момент. За миг застанавме, се насмевнавме и повторно бевме трогнати од магијата што се случува тука секој ден“, рече таа.

Медицинскиот центар „Мајанеи Хајешуа“ е познат по големиот обем на работа, особено со религиозната заедница во Бнеи Брак. Статистиките покажуваат дека стапката на фертилитет во Израел е 2,9 деца по жена, што е највисока меѓу земјите членки на ОЕЦД, нагласува ДПА.