„Воени туристи“ во Сараево: плаќале стотици илјади евра за „лов“ на луѓе

Германскиот Frankfurter Sonntagszeitung објави нови детали за скандалозниот феномен „Сараево сафари“, откриен преку сведочењето на поранешниот американски маринец Џон Џордан пред Хашкиот трибунал во 2007 година. Тој опишал групи странци – Германци, Руси, Канаѓани, Италијанци и Швајцарци – кои со ловна опрема доаѓале во Сараево за да пукаат по цивили.

Според новите документи што италијанскиот новинар Ецио Гавацени ги доставил до Обвинителството во Милано, најмалку стотина такви „воени туристи“ плаќале до 300.000 евра. Најскапа „мета“ биле децата, потоа вооружени мажи и жени, додека старците биле „бесплатни“.

Иако италијанската разузнавачка служба тврдела дека ги спречила ваквите активности во 1993 година, Гавацени истакнува дека „ловот“ продолжил и во 1994 и 1995 година.

Опсадата на Сараево (1992–1996) однесе 11.541 живот, од кои 1.621 деца. Снајперисти биле распоредени по ридовите и висококатниците околу градот, со директна линија на огин кон улиците и домовите. Гавацени ќе ја објави книгата „Викенд-снајперисти“, за која Netflix и Amazon веќе покажале интерес.