Белгија го блокира планот на ЕУ за користење на замрзнатите руски средства за Украина

Белгија денеска го отфрли предлогот на Европската Унија за користење на замрзнатите руски пари за поддршка на Украина, со образложение дека шемата носи значителни финансиски и правни ризици.

– Текстот што Европската Комисија ќе го презентира не ги решава нашите загрижености – изјави белгискиот министер за надворешни работи Максим Превост пред состанокот на НАТО во Брисел. Белгија стравува дека би можела да биде принудена да ги врати средствата доколку Русија покрене судска постапка.

Поголемиот дел од замрзнатите руски средства се чуваат во системот Еуроклир со седиште во Брисел, што ја прави Белгија главна земја загрижена за можни правни последици. Превост додаде дека „не е прифатливо да се користат парите и да се оставиме сами да се соочиме со ризикот“.

Целта на ЕУ е Украина да ги добие средствата пред да истече нејзиниот буџет во април 2026 година. Европската комисија предложи и земјите-членки да обезбедат милијарди во грантови или Унијата колективно да преземе заеднички долг за поддршка на Украина, која е во ризик од финансиски колапс.

Дополнително, Комисијата предложи нова правна рамка за да се спречи едноставно вето од земјите како Унгарија и Словачка при продолжувањето на санкциите кон Русија, со цел да се обезбеди стабилност и континуитет на санкцискиот режим.

Неуспехот за постигнување договор би значел дека даночните обврзници на ЕУ ќе ги сносат трошоците за поддршка на Украина, додека замрзнатите руски средства остануваат неискористени.