Глобалните платформи за брза мода „Шеин“ и „Тему“, познати по екстремно ниските цени и честите попусти, се најдоа под силен притисок во САД, каде политичари и институции бараат темелни истраги за нивното работење. Обвиненијата се движат од кражба на интелектуална сопственост и продажба на фалсификати, до користење принудна работа и небезбедни материјали.
Во Тексас, државниот обвинител Кен Пакстон покрена истрага против „Шеин“, следејќи ги чекорите на неколку европски земји што веќе презедоа мерки против компанијата. Паралелно, сенаторот Том Котон повика на федерална истрага и за „Шеин“ и за „Тему“, опишувајќи ги како „кинески комунистички платформи“ кои преку масовна продажба на евтини производи им наштетиле на американските компании и дизајнери.
„Шеин“ соопшти дека ги сфаќа сериозно забелешките и дека ќе соработува со властите во процесот. Иако компанијата е регистрирана во Сингапур, најголем дел од производството се одвива во Кина.
Критиките се засилија откако администрацијата на претседателот Доналд Трамп во август го укина „de minimis“ правилото, кое овозможуваше увоз на евтина стока без царина. Според сенаторот Котон, оваа промена нуди „златна можност“ за истражување на деловните практики на платформите кои ги преплавија американските магацини со мали пратки од Кина.
Дизајнери и мали модни брендови со години го обвинуваат „Шеин“ за систематско копирање на нивните креации. Според нив, реплики на нови колекции се појавуваат на апликацијата за само неколку дена — по цена која е само дел од оригиналната. Котон наведува дека овие случаи претставуваат поширок модел на прекршување на интелектуалната сопственост.
Во случајот со „Тему“, сенаторот посочи докази за продажба на „напредни и измамнички фалсификати“, додека американски истраги укажуваат дека значителен дел од производите на двете платформи може да се лажирани.
Обвинителот Пакстон дополнително предупреди дека постојат сериозни сомневања за користење принудна работа, опасни материјали и измамен маркетинг во рамките на „Шеин“. Компанијата одамна е критикувана за негативното влијание врз животната средина и работничките услови во фабриките што произведуваат евтина масовна стока.
Истрагата ќе ги опфати и практиките за собирање лични податоци на корисниците. „Нема да дозволам евтина и потенцијално опасна странска стока да го загрози здравјето на Американците“, изјави Пакстон.
Притисокот врз двете компании стигнува и од Европа. Француските власти побараа од „Шеин“ да ја прекине продажбата на детски секс-кукли и одредени видови оружје, а „Тему“ е под истрага поради штетна содржина достапна за малолетници.
Паралелно со тоа, Пакстон ја прошири кампањата против онлајн платформите и поднесе тужба против „Роблокс“, обвинувајќи ја за непочитување на безбедносните стандарди — обвинение кое компанијата го негира.
Со зголемените регулативи, можните казни и растечката критика, американските власти сега испраќаат јасна порака: ниската цена на брзата мода не смее да значи кршење на законот, угнетување на работници или загрозување на потрошувачите.
