Црквата „Св. Богородица“ во Тетово претставува значаен духовен и културно-историски споменик, чија историја датира од многу старо време и носи сведоштва за континуитетот на христијанскиот живот во Полог. Според податоците од книгата на Кузман Најденоски „Тетово во минатото како културен и просветен центар на Полог“ од 1964 година, на просторот под месноста Купеник, во близина на денешната црква „Св. Богородица – Балаклија“, по Балканските војни биле откриени урнатини од стар храм, икони, кандила и друг црковен прибор.
Во околината биле пронајдени и средновековни христијански гробови кои долго време биле предмет на прекопување. На местото каде што денес се наоѓа стариот градски водовод и централниот водосклад за Тетово, некогаш постоела црквата „Св. Петка“. При увид на екипа од градскиот музеј биле регистрирани ѕидни остатоци и керамички плочки што укажуваат на постара средновековна градба, која, според историските податоци, била обновувана во 1765 година. Денес, поради одземањето на црковното земјиште за потребите на резервоарот, можни се да се видат само делови од ѕидови високи околу еден метар, а постои иницијатива оваа црквичка да биде возобновена. Имотот, кој во катастарот се води како лозје, останува во сопственост на црквата со површина од 1.400 м².
Денешната црква „Св. Богородица“ во Горно Маало е подигната непосредно по Балканските војни, на урнатините на стар храм. Градежните работи започнале во 1903/04 година и траеле до 1916 година. Храмот е изграден од камен и полна печена цигла, со површина од 6,5 ари. Фреските и иконите ги изработил познатиот галички зограф Тале, кој тогаш престојувал во Гостивар. Осветувањето било извршено на 28 август 1918 година, на празникот „Успение на Пресвета Богородица“, од скопскиот митрополит Варнава.
Иконостасот е изработен во два вида – горниот дел во даборез, а долниот од обично дрво, што претставува уникатна комбинација во уметничкото оформување на храмот.
Црквата и денес претставува важен духовен центар за тетовчани, а новите истражувања фрлаат светлина врз нејзината богата, но недоволно проучена историја.
