Република

Тест-период: Скопје, Тетово и Куманово се опфатени со „Безбеден град“

Вториот ден од тест-периодот на системот „Безбеден град“ покажува значително намалување на сообраќајните прекршоци. Податоците од Министерството за внатрешни работи (МВР) покажуваат дека на 1 декември биле регистрирани 110 илјади прекршоци, додека на 2 декември бројката паднала на 50.652 прекршоци за 24 часа.

Од вкупниот број прекршоци за 2 декември, доминираат казните за пречекорување на брзината – 48.861. За поминување на црвено светло биле регистрирани 1.366 прекршоци, а 425 возила биле нерегистрирани. Во само 12 часа, системот евидентирал 22.600 прекршоци, од кои 95 отсто се за брзо возење. Најголемата забележана брзина изнесувала 209 км/ч, додека најмалата за која е изречена казна била 51 км/ч.

Според МВР, системот идентификувал „жешки точки“ каде се кршат правилата. Најбрзо се возело на излезот од Скопје кон Тетово и на булеварот „Никола Карев“, каде биле регистрирани 4.300, односно 3.000 прекршоци за брзо возење. Најмногу прекршоци за поминување на црвено светло се регистрирани на раскрсницата на улиците „Цветан Димов“ и „Џон Кенеди“ – 45 прекршоци.

Од 1 декември започна пробниот период на системот „Безбеден град“, кој ќе трае до 1 јануари 2026 година. Во овој период, возачите добиваат само предупредувања за сторени прекршоци, без казни. Од јануари следната година, системот ќе почне целосно да се применува.

Министерот за внатрешни работи, Панче Тошковски, нагласи дека никој нема да биде поштеден од казните кога системот ќе почне со целосна примена. Според него, воведувањето на „Безбеден град“ е клучна мерка за намалување на бројот на жртви на улиците, кој оваа година изнесува 142 лица.

Системот опфаќа Скопје, Тетово и Куманово, како и коридорите 8 и 10, обезбедувајќи автоматизирано регистрирање на сообраќајните прекршоци и подобрување на безбедноста на патиштата.

Република

Планирани прекини на струја утре во Тетовскиот регион

Повеќе населени места во Полошкиот регион утре ќе останат без струја поради изведување планирани технички зафати на електро-системот.

Во Тетово, прекинот е најавен за 5 декември од 06:00 до 06:30 часот и ќе ги опфати делови од село Челопек, целите села Милетино и Блаце, како и индустриските објекти во Челопек.

Во Групчин, електричната енергија ќе биде исклучена на 5 декември во периодот од 09:00 до 14:30 часот, а прекинот ќе го зафати дел од селото.

Истовремено, жителите на Селце ќе останат без струја од 09:00 до 14:00 часот, при што прекинот ќе важи за делови од населеното место.

Од надлежните апелираат граѓаните навреме да се прилагодат на најавените технички активности.

Република

Тетовските цариници спречија обид за увоз на 2000 кг фалсификат прашок за перење штетен за здравјето и животната средина

Царински службеници од ЦИ Тетово спречија обид за криумчарење на 2000 килограми фалсификат прашок за перење алишта со трговска марка Ариел, кој бил натоварен во Турција и наменет за увозник од Скопје. Станува збор за 200 вреќи од по 10 кг, кои ги повредуваат правата од интелектуална сопственост.

Одделението за нетарифни мерки и заштита на правата од интелектуална сопственост при Царинската управа го извести правниот застапник на носителот на правото, кој потврди дека прашакот е фалсификат и се согласи за уништување на стоката.

Против сторителот по завршување на постапката ќе биде поднесена соодветна пријава.

Царинските службеници истакнуваат дека секојдневните заложби во сузбивање на нелегалната трговија и шверцот се клучни за заштита на здравјето на граѓаните, како и за спречување на загадување на животната средина предизвикано од неконтролиран хемиски состав.

Република

Битола го отвора најголемиот зимски фестивал во Македонија – Зимска Приказна 2025/2026

Од 20 до 31 декември, Битола повторно ќе се преобрази во светлечка зимска бајка со осум локации полни со празнична магија. Од Плоштадот Магнолија, преку Широк Сокак, Офицерски и Пациото на музејот, па сè до Старата чаршија и Пелистер, градот ќе се претвори во голема сцена на култура, музика и улична уметност.

На посетителите им се подготвуваат детско кино под отворено небо, живи концерти, DJ сетови, зимски базар и гастрономски изненадувања, како и светлечки инсталации што ја нагласуваат архитектурата на Битола. Секоја локација ќе нуди различна атмосфера, создавајќи празнична целина што ги опфаќа сите генерации – од децата што веруваат во чудо, до семејствата и младите кои го бараат ритамот на градот.

Организаторите потенцираат дека Зимска Приказна не е само фестивал, туку празнична приказна што ја живее целата заедница, а оваа година Битола ветува уште посветла и повесела атмосфера за сите свои посетители.

Добредојдовте во Зимска Приказна на прагот на 2026 година!