Балкан

Барања за оставки и предвремени избори: масовни протести низ Бугарија со повици за „буџет за граѓаните, не за олигарсите“

Илјадници граѓани вчеравечер повторно излегоа на улиците во Софија и во десетина други бугарски градови, изразувајќи незадоволство од нацрт-буџетот за 2026 година и побарувајќи оставка на владата. Во главниот град, демонстрациите се одвиваа пред институциите во т.н. „Триаголник на моќта“, додека во Пловдив, Варна, Бургас, Русе, Шумен, Благоевград и Стара Загора граѓаните се собираа пред општинските згради, организирани главно преку социјалните мрежи.

Протестите ја изразуваат општата фрустрација од економските политики на владата, со транспаренти и повици како: „Буџет за народот, не за олигарсите“, „Државата е наша и не се продава“ и „Оставка!“. Демонстрантите ја критикуваат буџетската политика како социјално неосетлива и недоволна за справување со растечката сиромаштија.

Како директна последица на граѓанскиот притисок, парламентот денеска со убедливо мнозинство од 201 глас прифати повлекување на трите буџетски закони – за државниот буџет, за Националната каса за здравствено осигурување и за Државното социјално осигурување. Предлогот беше поднесен од пратеници од ГЕРБ-СДС, БСП и „Има таков народ“, а на него гласаа речиси сите политички групи.

Премиерот Жељазков, и покрај повлекувањето на буџетот, нагласи дека нема да се повлече од функцијата, истакнувајќи дека владата не може да остане без буџет непосредно пред влегувањето на Бугарија во еврозоната.

И покрај ова, гневот на народот продолжува. Според првичните информации, протестите поминаа мирно и без сериозни инциденти, а полицијата беше распоредена околу институциите. Организацијата на протестите варира од град до град – во Софија ја предводат опозициските партии и граѓански групи, додека во универзитетските центри, како Благоевград, иницијативата е студентска.

Демократските барања вклучуваат оставка на владата, транспарентна политика и борба против корупцијата. Неколку владини партнери веќе најавија дека би поддржале избори доколку кризата не се надмине, додека опозицијата најавува продолжување на протестите. Политичките аналитичари предупредуваат дека ситуацијата може да кулминира во наредните денови, а демонстрантите најавуваат дека акциите ќе продолжат сè додека „владата не ги слушне луѓето“.

Претходниот голем протест на 1 декември во Софија заврши со судири пред седиштето на ДПС Нов почеток, при што 14 лица се обвинети за тешко хулиганство, а 10 од нив се задржани во притвор најмалку 72 часа.

Балкан

Србија подготвена за сите сценарија – Дали ќе дојде до енергеткса криза

Извршниот директор на „Србијагас“, Душан Бајатовиќ, изјави дека земјата е целосно подготвена да избегне гасна криза, дури и ако до утре не се постигне договор со Русија. Тој нагласи дека очекува позитивен исход од разговорите, но дека постои и алтернативно решение.

Бајатовиќ посочи дека „Србијагас“ располага со значителни резерви и дека, доколку е потребно, гас може да се набави од трговци на меѓународниот пазар. „Имаме опција А – договор со Русија, кој мислам дека ќе се реализира. Но постои и опција Б, купување гас од трговци. Ова може да се компензира затоа што залихите ни се огромни,“ изјави тој за ТВ Прва.

Дополнително, како трета мерка, Бајатовиќ најави дека со замена на одредени енергетски извори во Белград, особено со премин од гас на мазут, може да се заштедат околу три милиони кубни метри гас дневно.

Претседателот на Србија, Александар Вучиќ, претходно соопшти дека доколку договор со Русија не биде постигнат до петок, од понеделник ќе започнат преговори за купување гас од други добавувачи. Според него, државата има подготвен одговор и нема да дозволи енергетска нестабилност.

Балкан

Весникот „Илинден“ излезе во јубилејно 70. издание

Ја споделувам радоста што ете доживеавме да го испечатиме јубилејното 70.издание на весникот, кој и понатаму буди голем интерес кај македонската читателска публика во Република Албанија, во татковината Македонија како и меѓу македонската дијаспора во светот. Се надевам дека ќе продолжиме со несмален интензитет да информираме со истата сериозност и пристап во објавувањето на темите, а се од интересен за македонското национално малцинство во Република Албанија, но и за промоција на активностите на македонската дипломатија во правец на подобрување на животот на македонското население надвор од границите на својата матична држава, изјави Никола Ѓурѓај, главен и одговорен уредник на весникот.

Во ова издание, покрај другото објавени се написите:

Македонско друштво “Илинден“-Тирана ќе биде домаќин на следниот семинар на работната група на словенските малцинства во Европа при Федералната унија на европските националности
Претседателот на Македонско друштво “Илинден”-Тирана, Никола Ѓурѓај му ја врачи наградата “Илинден” на Лорант Винце, претседател на ФУЕН
Генералното собрание на Федералната унија на европските националности (ФУЕН), на 69-от Конгрес едногласно усвои Резолуција поднесена од Македонско друштво „Илинден“- Тирана
Македонско друштво “Илинден“-Тирана со свој штанд на Конгресот на ФУЕН во Болзано, Италија
Претседателот на македонско друштво “Илинден”-Тирана, Никола Ѓурѓај во рамките на ФУЕН конгресот учестуваше на состанок на Работна група на словенски малцинства
Македонско друштво “Илинден”-Тирана му честишаше на ВМРО-ДПМНЕ за големата победа на локалните избори
Честитка од Македонското друштво “Илинден”-Тирана по повод 22-ри Ноември – Денот на Албанската азбука
Претседателот на Македонското друштво “Илинден”-Тирана, Ѓурѓај на средбата со Никчевски, директор на Националната и универзитетска библиотека Св. Климент Охридски – Скопје
Почина Славица Гаџова Свидерска, професорка по македонски јазик на Лекторатот по македонски јазик на Факултетот за странски јазици при Универзитетот во Тирана (1984-2025)
Телеграма од Македонско друштво “Илинден”-Тирана со сочуство до семејството на Славица Гаџова Свидерска
Македонско друштво “Илинден”-Тирана доби верски календари од Македонската православна црква – Охридска Архиепископија за Македонците во Албанија
Македонска алијанса за европска интеграција: Нема да замолчиме пред бугарските манипулации
Македонското друштво “Илинден“-Тирана ги осудува обидите на Софија со злоупотреба на здравјето на жителите во областа Преспа
Ѓурѓај: Извештајот на ФУЕН e десетгодишен труд на македонско друштво “Илинден“-Тирана
За девет месеци на граничниот премин Џепиште – Требиште областа Голо Брдо минале 36.938 патници или 9 отсто повеќе споредено со лани
Авантуристички парк во Студено областа Голо Брдо нов чекор за туристичко оживување на областа Голо Брдо
Почна со работа Специјалната собраниска комисија “За административно-територијална реформа“

На први март 2011 година како двоброј (март/април) беше испечатен првиот број на весникот, од мај 2017 година весникот е и со електронско издание www.vesnik-ilinden.coм

Во септември истата година, е стандардизиран според меѓународните норми за печатени и електронски периодични списанија со ISSN 2522-6282 (online) и ISSN 2522-4514 (print) и дел од двата најголеми читачи на вести и клиентска датотека во Македонија: time.mk, grid.mk, daily.mk и vesti.mk

Македонски весник “Илинден” е член на платформата Алијанса за етички медиуми (АЕМ) каде членуваат 29 печатени и аудиовизуелни медиуми во Република Албанија

Балкан

Земјоделците од Грција повторно ја блокираа границата на Евзони, можна блокада и на Ники

Земјоделците од северниот дел на Грција, од регионот на Пеонија, денеска повторно го затворија граничниот премин Евзони (Богородица) за сообраќај од и кон Македонија. Блокадата започна околу 13 часот по локално време, кога на преминот пристигнаа дополнителни 100 трактори од Јаница за зајакнување на протестот.

Според дописничката на МИА од Атина, траењето на блокадата не е познато, бидејќи, како и претходните денови, таа беше ненајавена. Вчера преминот Евзони беше затворен околу два часа, од 12 до 14 часот по локално време, со дополнителни кратки блокади во попладневните часови.

Практиката на земјоделците е да не ги најавуваат блокадите, а на дневни состаноци се одлучува кога и колку долго ќе траат. Според информациите, сличен режим веројатно ќе се следи и во наредните денови.

Земјоделците од северозападна Грција, во близина на Лерин, пристигнаа и до граничниот премин Ники (Меџитлија) кон Македонија и кусо го блокираа сообраќајот. Блокади се регистрирани и на други премини, како Промахонас кон Бугарија и Кипи кон Турција, каде што не се пропуштаат камиони.

Во внатрешноста на Грција, блокадите се проширени: кај Никеа во близина на Лариса има околу 1.800 трактори на автопатот Солун-Атина, над 2.000 трактори блокираат патот кај Кардица, а блокади има и на излезот од Солун кон Атина. На некои локации земјоделците поставија новогодишни елки како порака дека нема да се повлечат и дека се подготвени да го минат празничниот период на улица.

Протестите започнаа во неделата и најавуваат постепено интензивирање до 5 декември, но засега нема информации кога ќе завршат.