Сезоната на грип во Македонија забележува значително забрзување, покажуваат најновите податоци на Институтот за јавно здравје. Во периодот од 24 до 30 ноември биле регистрирани 114 нови случаи на грип и заболувања слични на грип – неделно зголемување од 25,3 проценти.
Епидемиолозите предупредуваат дека вирусот интензивно циркулира и дека сезоната влегува во фаза на забрзано ширење. Во однос на истиот период лани, бројот на заболени е поголем за 75,4 проценти, а споредбено со просекот од последните 15 сезони е забележан раст од 2,7 проценти.
Случаи на грип се пријавени во 11 центри за јавно здравје низ земјата. Најмногу заболени има во Куманово – 49 нови случаи, потоа Струмица со 16, Штип со 11 и Тетово со 9. Гостивар регистрира 7 заболени, Прилеп и Кавадарци по 6, Македонски Брод 5, Неготино 3, додека по еден случај се евидентирани во Радовиш и Скопје.
Од почетокот на сезоната се регистрирани 776 заболени лица – раст од 70,9 проценти во споредба со лани, и зголемување од 25,9 проценти во однос на долгорочниот модел. Кумулативни случаи се пријавени во 15 центри за јавно здравје, при што најмногу заболени има во Гостивар, а највисока инциденца според бројот на жители е забележана во Македонски Брод.
Најпогодена е возрасната група од 15 до 64 години, во која се пријавени 584 случаи, што е очекувано бидејќи ги опфаќа најголемиот дел од населението.
Институтот за јавно здравје потсетува дека вакцинацијата останува најсигурната заштита од потешки форми на грип и компликации, а надлежните апелираат граѓаните навреме да се вакцинираат, да следат здравствени препораки и да избегнуваат контакт со заболени лица, бидејќи податоците укажуваат дека сезоната влегува во интензивна фаза.
