Царински службеници од ЦИ Тетово спречија обид за криумчарење на 2000 килограми фалсификат прашок за перење алишта со трговска марка Ариел, кој бил натоварен во Турција и наменет за увозник од Скопје. Станува збор за 200 вреќи од по 10 кг, кои ги повредуваат правата од интелектуална сопственост.

Одделението за нетарифни мерки и заштита на правата од интелектуална сопственост при Царинската управа го извести правниот застапник на носителот на правото, кој потврди дека прашакот е фалсификат и се согласи за уништување на стоката.

Против сторителот по завршување на постапката ќе биде поднесена соодветна пријава.

Царинските службеници истакнуваат дека секојдневните заложби во сузбивање на нелегалната трговија и шверцот се клучни за заштита на здравјето на граѓаните, како и за спречување на загадување на животната средина предизвикано од неконтролиран хемиски состав.

Од 20 до 31 декември, Битола повторно ќе се преобрази во светлечка зимска бајка со осум локации полни со празнична магија. Од Плоштадот Магнолија, преку Широк Сокак, Офицерски и Пациото на музејот, па сè до Старата чаршија и Пелистер, градот ќе се претвори во голема сцена на култура, музика и улична уметност.

На посетителите им се подготвуваат детско кино под отворено небо, живи концерти, DJ сетови, зимски базар и гастрономски изненадувања, како и светлечки инсталации што ја нагласуваат архитектурата на Битола. Секоја локација ќе нуди различна атмосфера, создавајќи празнична целина што ги опфаќа сите генерации – од децата што веруваат во чудо, до семејствата и младите кои го бараат ритамот на градот.

Организаторите потенцираат дека Зимска Приказна не е само фестивал, туку празнична приказна што ја живее целата заедница, а оваа година Битола ветува уште посветла и повесела атмосфера за сите свои посетители.

Добредојдовте во Зимска Приказна на прагот на 2026 година!

До крајот на декември електронскиот систем „Безбеден град“ ќе почне да функционира и во Куманово и во Тетово, најави началничката на Секторот за сообраќајни работи во МВР, Маја Арсовска Манов, во гостување на Топ Тема на Телма.

Во моментов системот е активен на целата територија на Град Скопје, каде што автоматски ги регистрира сообраќајните прекршоци.

„Активиран е електронскиот систем за детектирање на прекршоци. До крајот на месецов планираме да се активира истиот систем и во градовите Куманово и Тетово, а од следната година ќе биде имплементиран на територија на цела држава“, изјави Арсовска-Манов.

Опремата веќе е поставена и на Коридорите 8 и 10, од каде што, во секој момент, се очекува да започне автоматското детектирање на прекршоци.