Грција веќе неколку дена е парализирана! Револтот на земјоделците, незадоволни од третманот на Владата, ескалираше во масовни протести кои ја фрлија земјата во хаос. Десетици сообраќајници, регионални и локални патни правци се блокирани, а сообраќајот на клучните гранични премини е во колапс.
Најголем удар трпи сообраќајот кон Македонија. Граничниот премин Евзони (Богородица), клучната артерија меѓу двете земји, вчера беше повторно блокиран од 17 часот, како последица на бескрајниот штрајк. Ова беше втор прекин во текот на вчерашниот ден, откако утрото беше затворен, па нормализиран, за повторно да биде заклучен попладне. Како што информира АМСМ, блокадите се случуваат во различни периоди од денот, што го претвори патувањето меѓу Македонија и Грција во вистинска лотарија. Единствена светла точка: Сообраќајот на ГП Ники (Меџитлија) беше нормализиран, додека на ГП Дојран сè уште функционира без застои.
Со најмалку 40 земјоделски блокади низ целата земја и секојдневно засилување на протестите, грчката Влада брза да ги отклучи одложените земјоделски исплати. Тензиите веќе прераснаа во насилни инциденти на аеродромите на Крит и пред канцеларијата на министерот во Кардица.
Министерот за развој на земјоделството, Костас Цијарас, очајно повика на дијалог: “Подготвени сме веднаш да разговараме со земјоделците – денес, утре, кога и да е потребно.”
Владата ја остава отворена можноста за преиспитување на распределбата на земјоделскиот дизел и продолжување на субвенциите за електрична енергија. Сепак, како главен проблем останува неспособноста на земјоделците да се организираат и да настапат со унифицирани барања.
Основна причина за немирите се доцнењата во исплаќањата на субвенциите. Околу 140.000 производители беа исклучени од авансните плаќања поради проблеми со сателитското мапирање, предизвикани од грчкиот орган OPEKEPE. Уште посложено е прашањето за 13.451 сточари од Крит, Серес и Лариса, кои не добиле исплата бидејќи не можеле да пријават доволно пасишта.
Состојбата на Крит е особено вжештена! Протестите нагло ескалираа, претворајќи се во отворен судир со властите. Во Ираклио, земјоделците го пробија периметарот на аеродромот и влегоа на пистата! Во Ханија, избувнаа судири во близина на аеродромот, каде полицијата ги блокираше демонстрантите. Следуваше фрлање камења, солзавец и повреда на полицаец.
Властите не останаа неми: Најмалку 15 учесници се идентификувани и се соочуваат со сериозни обвиненија, вклучувајќи обид за убиство, формирање криминална организација и прекршоци со оружје.
Премиерот Киријакос Мицотакис испрати јасна порака: вратата за дијалог е отворена, но ултимативно бара прекин на насилството.
„Нашата врата е секогаш отворена, но дијалогот мора да се одвива со отворени патишта“, предупреди тој.
Мицотакис истакна дека екстремните дејствија ризикуваат да го свртат јавното мислење против земјоделците и нагласи дека преговорите мора да ги почитуваат фискалните ограничувања на ЕУ.
Како најава за следната ескалација, земјоделците планираат блокада на пристаништето Волос, каде ќе им се придружат и рибарите. Кризата во Грција е далеку од завршена.
