Главниот град на Бугарија вчера беше сведок на вжештени тензии и масовни апсења за време на опозицискиот протест. Полициската управа во Софија денеска потврди дека повеќе од 40 лица се лишени од слобода.
Според извештаите на бугарските медиуми, најголемиот дел од приведените се од групите познати по нивната црна униформа и качулки, кои често се поврзуваат со провокации.
Иако протестот во голема мера помина без сериозни инциденти, во еден момент ситуацијата можеше да ескалира.
Лица со маски и качулки се обидоа да запалат контејнери за отпад, но брзата интервенција на полицијата ја смири напнатоста. Кај приведените биле пронајдени пиротехнички средства, спрејови и маски, што укажува на подготвеност за судир. Дел од уапсените биле и без лични документи, што го отежнува нивното брзо идентификување.
На контролните пунктови околу местото на одржување на протестот, полицијата открила и нешто што ја прави ситуацијата уште посомнителна: кај двајца од приведените биле пронајдени големи суми пари.
Полицијата соопшти дека истрагата продолжува, со цел да се расветли позадината на овие активности и дали има организиран обид за нарушување на јавниот ред и мир.
