43-годишниот Ахмед ал Ахмед е на операција за отстранување на неколку куршуми од раката и рамото, но е вон животна опасност.

Пред да тргне во херојска акција и да му го одземе оружјето на напаѓачот во Сиднеј, кој уби дузина луѓе, Ахмед бил свесен дека лесно може да го загуби животот и испратил последна порака до своето семејство.

„Ќе умрам, те молам оди да го посетиш моето семејство и кажи им дека отидов да спасам животи“, му рекол Ахмед на својот братучед Јозај Алканџ пред да се упати кон напаѓачот и храбро да му ја грабне пушката на еден од напаѓачите во масакрот на плажата Бонди, каде загинаа 15 лица.

Ахмед бил ранет кога Навед Акрам (24), син на другиот напаѓач, пукал кон него на блискиот мост, погодувајќи го во рацете и рамото. Според лекарите, неговиот живот не е загрозен, а роднините велат дека е во добро расположение.

Драматични видеа со над 20 милиони прегледи го прикажуваат моментот кога Ахмед се прикрадува кон напаѓачот зад паркирани автомобили, додека тој пука во жртвите. Во следниот миг, Ахмед успева да го разоружа и да го собори на земја.

Таткото на Ахмед, Мохамед Фатех ал Ахмед, за Еј-Би-Си Австралија изјави дека неговиот син има „инстинкт на заштитник“.

– Мојот син е херој. Служеше во полицијата и во централните безбедносни сили и секогаш имал потреба да ги штити луѓето. Кога видел крв и повредени насекаде, неговата совест го натерала да реагира. Гордо можам да кажам дека тој е херој на Австралија – рече таткото.

Мајката Малакех Хасан ал Ахмед истакна дека е неизмерно горда на својот син, опишувајќи го како човек кој секогаш дава. Други роднини велат дека Ахмед немал големо искуство со огнено оружје, но покажал исклучителна храброст.

Премиерот на Нов Јужен Велс, Крис Минс, го пофали подвигот.

– Тоа е најневеројатната глетка што сум ја видел. Еден човек му приоѓа на вооружен напаѓач и сам го разоружува, ризикувајќи сè за да спаси други животи. Благодарение на неговата храброст, многумина се живи денес – изјави Минс.

На платформата GoFundMe е отворена кампања во чест на Ахмед, каде досега се собрани над еден милион долари, меѓу кои и донација од речиси 100.000 долари од американскиот милијардер Бил Акман.

По масакрот, кој го извршија татко и син од пакистанско потекло за време на одбележувањето на еврејскиот празник Ханука, граѓаните палат свеќи и оставаат цвеќе пред импровизираниот споменик во Бонди Павилјон, додека полицијата и приватните безбедносни служби ја зголемија безбедноста во областа.

Грчките власти, во соработка со американската DEA, открија и запленија големо количество кокаин на брод кој пловел низ Атлантикот. Според првичните информации, станува збор за неколку тони дрога, што ја прави оваа акција една од поголемите заплени на кокаин во последните години. Во рамки на истрагата уапсени се најмалку пет лица, меѓу кои и лица поврзани со организирани криминални мрежи кои се занимаваат со меѓународна трговија со дрога.

Бродот, кој тргнал од Грција кон Латинска Америка за да преземе товар, бил запрен при враќањето кон Европа. Полицијата истакнува дека истрагата е во тек и дека се работи на целосно разоткривање на шемата, вклучувајќи ги сите учесници и можните дистрибутивни мрежи.

Оваа заплена е дел од пошироките напори на меѓународните власти да се сузбие трговијата со дрога, која во последните години бележи пораст на илегалните транспортни операции преку морски патишта. Експертите предупредуваат дека ваквите акции се од критично значење за зачувување на безбедноста и намалување на дрогата што стигнува на европските пазари.

Светот е ужаснат по вчерашниот терористички масакр на идиличната плажа Бонди во Сиднеј, кој однесе најмалку 15 невини животи. Додека глобалните лидери испраќаат сочувство, израелскиот премиер Бенјамин Нетанјаху отиде чекор понатаму, упатувајќи жестоки и директни обвинувања кон австралиската влада, тврдејќи дека нејзиниот неуспех да се справи со антисемитизмот е директен пат кон трагедијата, јавува The Guardian.

Нетанјаху не штедеше зборови во нападот. Тој шокираше со тврдењето дека уште во август му пишал на својот австралиски колега Ентони Албанез, предупредувајќи го дека одлуката на Канбера да признае палестинска држава „додава масло на огнот на антисемитизмот“. Според Нетанјаху, овој потег „ги охрабрува оние што им се закануваат на австралиските Евреи и ја разгорува омразата кон Евреите што сега се крие на вашите улици“.

„Вашата влада не направи ништо за да го спречи ширењето на антисемитизмот во Австралија. Не направивте ништо за да ги потиснете клетките на мракот што растеа во вашата земја. Не презедовте никакви мерки. Дозволивте болеста да се шири, а резултатот се ужасните напади врз Евреите што ги видовме денес“, изјави Нетанјаху, обвинувајќи го Албанез дека „ја заменил слободата со слабост, а попуштањето со поголемо попуштање“.

Сепак, Нетанјаху накратко го пофали храбриот муслиман – очевидец кој успеал да му го одземе пиштолот на еден од напаѓачите, спречувајќи смрт на „невини Евреи“. „Но, во моментов сме загрижени за нашиот народ, нашата безбедност и нема да молчиме“, заклучи тој.

Од целиот свет пристигнуваат пораки на недвосмислена осуда на терористичкиот чин, особено потенцирајќи го неговиот антисемитски карактер, бидејќи нападнати биле еврејски семејства кои ја славеле првата ноќ на Ханука.

Израелскиот претседател Исак Херцог во видео порака истакна дека „гнасните терористи намерно ги таргетирале невини еврејски семејства“.

Доналд Трамп го нарече нападот „ужасен антисемитски напад“, додека државниот секретар Марко Рубио изјави: „Антисемитизмот нема место на овој свет“.

Британскиот премиер Кир Стармер веста ја нарече „длабоко вознемирувачка“, а Кралот Чарлс и Кралицата Камила изразија „згрозеност и тага од најстрашниот антисемитски терористички напад“.

Премиерот на Нов Зеланд, Кристофер Луксон, шокиран од сцените, порача: „Австралија и Нов Зеланд се повеќе од пријатели, ние сме семејство“.

Володимир Зеленски, премиерот на Украина изрази „солидарност“ и порача: „Теророт и омразата никогаш не смеат да надвладеат“.

Генералниот секретар на ОН, Антонио Гутереш, на Икс напиша дека е „згрозен и го осудува денешниот гнасен смртоносен напад“.