Економија

Голема енергетска инвестиција: Откриено кој стои зад изградбата на најголемите складишта за струја

Владата официјално го објави првиот годишен енергетски инвестициски план, отворајќи ја вратата за историски инвестиции кои ќе го трансформираат електроенергетскиот систем на земјата. Во фокусот се батериските складишта за електрична енергија – клучниот елемент за стабилизација на мрежата која е под сѐ поголем притисок од експлозијата на фотонапонски централи.

Складирањето на вишокот енергија од обновливите извори веќе не е луксуз, туку итна неопходност за енергетската транзиција. Но, очигледно е дека ова е и нова златна можност за профит, судејќи според амбициозните планови на инвеститорите.

Интересот ги надмина сите очекувања. Министерството за енергетика примило вкупно 37 иницијативи за изградба на изолирани складишта. Вкупната инсталирана моќност достигнува импресивни 675,624 MW, со капацитет за складирање од неверојатни 1863,896 MWh! Овие проекти, одобрени од МЕПСО и ЕВН Електродистрибуција, се чекор кон поефикасен, посигурен и независен електроенергетски систем.

Иако локациите на овие стратешки објекти сѐ уште остануваат под превез на тајност, имињата на инвеститорите се веќе познати – и многу од нив се новоосновани фирми, желни да го заграбат своето парче од енергетскиот колач.

На чело на листата, со најголеми амбиции, се издвојуваат новооснована фирма (2024) од хрватската IE-Energy, БЕСС Проект, која планира колосално складиште од 90 мегавати, со 61,66 MW влегува бизнисменот Ајри Шеј, сопственик на Тесса Груп и најавувач на гасна централа таму, Дабур 1, Пробат Енергија (на Александар Влахо), Бат Инженеринг (на Даниел Поповски) и ОСМ Солар (на бугарската „Реналфа“), кои најавуваат складишта од по 50 мегавати. „Реналфа“ е веќе позната во земјава како косопственик на големата фотонапонска централа во Осломеј.

Изгледа дека градежните магнати одлучија да ги прошират своите бизниси и во енергетскиот сектор. Виенто Енергетико и Биг Сториџ, во сопственост на Бранко Георгиевски, сопственик на градежната компанија „Биси“, најавуваат по 40 мегавати и Биг Енерџи Солутионс со истата моќност (40 MW), пријавена и на име на сопругата на Ивица Георгиевски, исто така од „Биси“.

Покрај нив, уште еден поединец, Мартин Кочков, пријавил инсталација од 40 мегавати, а зад него следи Б&Х Солар Енерџи на Украинецот Јевген Јаременко.

Општоприфатената инвестиција за 1 мегават батериски систем се движи од 180.000 до 550.000 евра, а цената драстично зависи од тоа колку долго батеријата може да ја задржи електричната енергија.

Со вишокот енергија од соларните централи кој создава дебаланс и проблеми во мрежата, складирањето е неизоставен чекор кон флексибилност и сигурност. За инвеститорите, ова е најава за нов, профитабилен бран на инвестиции.

Економија

Историски удар за германската автомобилска индустрија: Волксваген ја затвора фабриката во Дрезден

Германската автомобилска индустрија се соочува со сериозни предизвици откако Волксваген најави дека ќе ја запре производството во својата фабрика во Дрезден. Ова е прво затворање на фабрика во Германија во 88-годишната историја на компанијата, што означува историски момент за индустријата која долго време беше мотор на германската економија.

Причините за затворањето се поврзуваат со структурните промени во автомобилската индустрија, особено транзицијата кон електрични возила и потребата за намалување на трошоците. Од Волксваген соопштуваат дека ќе преземат мерки за поддршка на вработените, вклучително и понуди за пренасочување кон други објекти и програми за обука.

Експертите предупредуваат дека ова затворање може да има пошироки последици врз германската економија и добавувачите во автомобилскиот сектор, особено во регионот околу Дрезден. Автомобилската индустрија во Германија, која долго време беше симбол на технолошка извонредност и економска стабилност, сега се соочува со потреба од брзи адаптации за да остане конкурентна на глобалниот пазар.

Економија

Од полноќ нови цени на горивата

Регулаторната комисија за енергетика, водни услуги и услуги за управување со комунален отпад (РКЕ) донесе Одлука со која се врши намалување на малопродажните цени на нафтените деривати во просек за 2,09% во однос на одлуката од 12.12.2025 година. Поевтинуваат горивата од полноќ.

Малопродажните цени на бензините ЕУРОСУПЕР БС-95 и ЕУРОСУПЕР БС-98 како и на ЕУРОДИЗЕЛ (Д-Е V) се намалуваат. Поевтинуваат горивата за 2,00 ден/лит.

Малопродажната цена на Екстра лесното масло за домаќинство на (ЕЛ-1) се намалува за 1,00 ден/лит.

Малопродажната цена на Мазутот М-1 НС се намалува за 0,248 ден/кг и сега ќе изнесува 32,635 ден/кг.

Од 16.12.2025 година од 00:01 часот максималните цени на нафтените деривати ќе изнесуваат:

Моторен бензин ЕУРОСУПЕР БС – 95 73,00 (денари/литар)
Моторен бензин ЕУРОСУПЕР БС – 98 75,00 (денари/литар)
Дизел гориво ЕУРОДИЗЕЛ БС (Д-Е V) 66,50 (денари/литар)
Масло за горење Екстра лесно 1 (ЕЛ-1) 65,50 (денари/литар)
Мазут М-1 НС 32,635 (денари/килограм)

Економија

Скопје добива авиолинии до Прага и Келн

Од Меѓународниот аеродром Скопје вечер во 19:25 ќе биде обновена линијата на Виз ер до Келн со четири лета неделно – секој понеделник, среда, петок и недела.

Оваа авиолинија е порака дека Македонија ги отвора вратите кон Европа и ја зацврстува поврзаноста со еден од најдинамичните региони, рече министерката за енергетика, рударство и минерални суровини Сања Божиновска на прес-конференција на скопскиот аеродром.

Таа нагласи дека секоја нова дестинација што им ја отвораме на граѓаните е нова можност – за подобра економска соработка, повеќе туристи, побрз развој на бизнисот и нови партнерства.

Тоа е и можност за поголема видливост на Македонија и посилно вклучување во европските економски и технолошки текови, додаде Божиновска, истакнувајќи дека на нејзина иницијатива повторно се воспоставува авиолинијата Скопје – Прага, која беше во функција од 2005 до 2012 година.

Неџат Курт, генерален директор на Виз ер, нагласи дека отворањето на рутата создава нови можности за патниците и поврзување на двата града, како и економска соработка, туризам, културни разменувања и развој на деловни врски.

Среќен сум што директната линија ќе ја направи Прага подостапна за македонските граѓани и компании и ќе им овозможи на чешките туристи и инвеститори полесно да ја откријат Македонија, рече Курт.

Андраш Радо, директор за комуникации во Виз ер, соопшти дека цената на билетот за летот Скопје – Прага во еден правец за јануари е 21 евро.

Посветени сме да имаме ниски цени и не се предвидуваат корекции, додаде Радо.

Според Курт, следната година се очекува раст од 20 проценти на авиосообраќајот од македонските аеродроми, со над 3,5 милиони патници.