Свет

САД ѝ поставија услов на Украина за мир

Американските мировни посредници ѝ порачале на Украина дека како дел од можен договор за завршување на војната ќе мора да се согласи на повлекување на своите сили од источниот дел на Донецката област, изјави функционер запознаен со разговорите одржани во Берлин.

Според изворите, кои зборувале под услов на анонимност по завршувањето на вториот ден преговори меѓу украинските и американските претставници, Киев побарал продолжување на дискусиите, бидејќи и понатаму постојат сериозни несогласувања околу територијалните прашања.

Украинскиот претседател Володимир Зеленски во Берлин одржа средби со американскиот изасланик Стив Виткоф, Џаред Кушнер – зет на американскиот претседател Доналд Трамп, како и со повеќе европски лидери. Иако Украина е под зголемен притисок од администрацијата на Трамп да направи отстапки кон Русија, официјален Киев во јавноста настапи со умерен оптимизам.

Секретарот на Советот за национална безбедност и одбрана на Украина, Рустем Умеров, изјави дека разговорите биле конструктивни и дека е постигнат одреден напредок, нагласувајќи ја улогата на американскиот тим во обидите за наоѓање трајно мировно решение.

Клучните точки на преговорите остануваат статусот на украинската територија и можноста за членство во НАТО. Украина сигнализираше дека е подготвена да се откаже од амбицијата за влез во Алијансата, доколку добие цврсти и обврзувачки безбедносни гаранции од Западот. Сепак, не е јасно дали е постигнат напредок по ова прашање и дали разговорите можат да доведат до прекин на огнот прифатлив и за Москва.

Од Кремљ порачаа дека барањето Украина да не стане членка на НАТО е клучен услов за било каков мировен договор, додавајќи дека Русија очекува дополнителни информации од САД по берлинските разговори.

Во меѓувреме, анкетите во Украина покажуваат дека мнозинството граѓани се подготвени за договор што би ја замрзнал сегашната линија на фронтот, но силно се спротивставуваат на отстапување територии без јасни безбедносни гаранции.

Преговорите во Берлин се одвиваат во рамки на чувствителна дипломатска недела за Европа, во која лидерите на ЕУ, НАТО и клучните европски држави се обидуваат да најдат заеднички пристап кон поддршката на Украина и можните патишта кон мир.

Свет

Американски Конгрес: Корупцијата и странското влијание ја кочат европската перспектива на Балканот

Зависноста од руските енергенси, зголеменото влијание на Кина и широко распространетата корупција се идентификувани како клучни пречки за европската интеграција на земјите од Западен Балкан, се наведува во Законот за овластување за национална одбрана на САД, усвоен од Конгрес на САД, кој треба да го потпише американскиот претседател Доналд Трамп.

Во делот посветен на регионот, документот јасно посочува дека САД нема да поддржат политики што поттикнуваат територијални размени, поделби или прецртување на границите по етнички линии, како и дека ќе се спротивстават на, како што се наведува, злонамерните политики на Русија и Кина во Западен Балкан. Вашингтон ја потврдува и својата поддршка за евроатлантската интеграција, демократскиот развој и економската стабилност на земјите од регионот.

Во законот се предупредува дека растечкото кинеско влијание може негативно да се одрази врз демократијата, стратешката конкуренција и економската интеграција со Европа. Се нагласува дека САД и земјите од Западен Балкан имаат заеднички интерес за стабилен и одржлив економски развој и спречување на повторна ескалација на етнички тензии.

Документот предвидува и можност за воведување санкции против поединци или политики што го загрозуваат мирот, безбедноста или територијалниот интегритет на која било земја во регионот. Посебен акцент е ставен на корупцијата, која се оценува како една од најсериозните пречки за политичкиот и економскиот напредок.

Според законските одредби, претседателот на САД може да воведе санкции во рок од 90 дена од стапувањето во сила на законот против секое странско лице за кое ќе се утврди дека било вклучено во коруптивни активности поврзани со Западен Балкан, вклучително и актуелни или поранешни јавни функционери.

Во документот се изразува и длабока загриженост за состојбата на демократијата во Србија по последните изборни процеси, како и за потребата од напредок во спроведувањето на договорите меѓу Белград и Приштина. Дополнително, се нагласува значењето на продолжувањето на мисијата на ЕУФОР во Босна и Херцеговина.

Свет

Инцидент со огнено оружје во Њујорк: Ранети тројца полицајци по семејна расправија

Тројца полициски службеници се здобиле со повреди, а осомничениот напаѓач е прогласен за мртов по сериозен инцидент со огнено оружје во градот Рочестер, сојузната држава Њујорк.

Според информациите, инцидентот започнал како семејна расправија, која ескалирала во насилна конфронтација што се проширила на неколку улици во градот. Полицијата интервенирала по пријава, при што дошло до пукање.

Како што пренесува Асошиејтед Прес, покрај тројцата полицајци, повреден е и уште еден маж. Засега нема информации за тежината на повредите, а надлежните органи спроведуваат истрага за целосно расветлување на настанот.

Свет

Над 350 уапсени во голема полициска акција во Италија

Италијанските власти спроведоа масовна операција против трговија со дрога, при што уапсени се 384 лица, а запленети 1,4 тони дрога.

Покрај апсењата, полицијата отвори истраги против уште 655 лица, меѓу кои и 39 малолетници, и заплени 35 килограми кокаин и повеќе од 40 парчиња огнено оружје. Операцијата се спроведуваше во неколку провинции и резултираше со привремено затворање на пет продавници за канабис во три града по 312 инспекции.

За време на контролите, полицијата одзеде 296 килограми производи од канабис, кои тестовите покажаа дека содржат нелегални дроги. Во јуни оваа година, Италија воведе нови безбедносни регулативи со кои се забранува продажбата на таканаречениот „легален“ или „лесен“ канабис, односно индустриски коноп без психоактивни ефекти.