Економија

И покрај уверувањата, Фолксваген ја затвора фабриката во Дрезден

Иконичната Стаклена Фабрика на Фолксваген во Дрезден, еден од најпознатите симболи на германската автомобилска индустрија, стои на прагот на драстична промена. Отворена во 2001 година со големи амбиции да го произведува луксузниот модел Phaeton, фабриката сега се соочува со сериозни економски предизвици кои ја доведуваат во прашање иднината на традиционалното производство на автомобили.

Иако Фолксваген со години уверуваше дека нема да затвора фабрики во Германија, „Фабриката од стакло“ во својата оригинална форма ќе престане да постои. Но, приказната тука не завршува – просторот ќе добие нов живот како голем иновативен центар, во партнерство со Техничкиот универзитет во Дрезден. Ова е првата фабрика на Фолксваген што се затвора во Германија во последните 88 години.

Фабриката, која се отвори со големи амбиции во 2001 година за производство на луксузниот седан Phaeton, во 2017 година беше преориентирана кон електричниот e-Golf, а од 2019 година па натаму го произведуваше моделот ID.3. До средината на декември 2025 година, посетителите сè уште можат да го видат производството на ID.3 во Дрезден. Но, од 2026 година, фабриката ќе се трансформира во платформа за наука и иновации – место каде што технологијата, вештачката интелигенција и новите концепти за мобилност ќе можат да се истражуваат и доживеат одблизу.

Сепак, затворањето на фабриката е и симболичен удар за германската автомобилска индустрија. По „Дизелгејт“ скандалот од 2015 година, кој ја потресе групацијата, Фолксваген се обиде да се реинвентира преку целосна електрификација. Во 2019 година, брендот го претстави ID.3 како своја „нова икона“ – автомобил кој требаше да биде пресвртница, на ниво со легендарниот Буба или Голф. Но реалноста покажа дека продажбата не ја оправда големата амбиција, а производството во Дрезден сега завршува.

Производството на ID.3 ќе продолжи во поголемата фабрика во Цвикау, 115 километри од Дрезден, која е дизајнирана да произведува до 360.000 електрични возила годишно, но годинава најверојатно ќе достигне само околу 200.000. Во меѓувреме, фабриката во Кемниц – специјализирана за возила со мотори со внатрешно согорување – произведува повеќе од 730.000 единици годишно.

Многумина експерти сугерираат дека транзицијата на Фолксваген кон целосно електрични возила не била стратегиски најдобра, особено во период кога пазарот се движи кон хибридни и plug-in хибридни модели како „премостување“ кон електрификација. Во меѓувреме, Тојота, која повеќе од две децении инвестира во хибридни технологии, се покажува како победник на овој стратегиски пресврт.

„Стаклената фабрика“ во Дрезден, со својата транспарентна архитектура и визионерски дух, можеби ја завршува ерата на традиционалното производство, но отвора ново поглавје: светот на иднината на мобилноста и технологијата.

Економија

Странски „хај-тек“ инвестиции од Германија и Турција: 80 милиони евра и илјада нови работни места

Македонската економија влегува во нова фаза на развој со најавата за две значајни странски инвестиции во областа на високата технологија. Премиерот Христијан Мицкоски соопшти дека германска и турска компанија ќе инвестираат околу 80 милиони евра, носејќи свеж капитал надвор од досега доминантната автомобилска индустрија.

Според најавите, двата проекта ќе имаат силен извозен карактер и значајна додадена вредност. Се очекува годишен извоз од над 200 милиони евра, како и отворање на приближно 1.000 нови работни места, главно во сегментот на високо квалификуван кадар.

Мицкоски истакна дека ваквите инвестиции го потврдуваат стратешкото насочување на државата кон високо-технолошки индустрии, со цел диверзификација на економијата и намалување на зависноста од еден сектор. Тој изрази оптимизам дека до крајот на годината ќе следат уште нови странски вложувања.

Најавените проекти се оценуваат како јасен сигнал за подобрена инвестициска клима и дел од пошироките напори за привлекување современи технологии, повисоки плати и одржлив економски раст.

Економија

Димитриеска – Кочоска: 97 милиони евра за клучни енергетски проекти

Денеска беа потпишани договори за државна гаранција и заеми во вкупна вредност од 97 милиони евра, со кои ќе се реализираат стратешки енергетски проекти што значително ќе ја променат енергетската слика на државата.

Министерството за финансии, преку издавање државна гаранција, овозможи финансирање од 87 милиони евра за проектот „Фотонапонска електроцентрала Битола 3“. Од оваа сума, 50 милиони евра се обезбедени од КфВ, а 37 милиони евра од Европската банка за обнова и развој. Дополнително, обезбедени се и 10 милиони евра за ревитализација на хидроелектраните.

Министерката за финансии Гордана Димитриеска – Кочоска изрази благодарност до меѓународните финансиски институции за континуираната поддршка, како и до тимот на АД ЕСМ за нивната посветеност во реализацијата на проектите.

Според неа, овие капитални инвестиции ќе придонесат за зајакнување на домашното производство на електрична енергија, ќе обезбедат посигурно и постабилно снабдување и ќе дадат силен поттик за економска стабилност и одржлив развој на државата.

Економија

Божиновска: Нема енергетска криза, државата има резерви од мазут!

Граѓаните нема да почувствуваат никакви прекини во снабдувањето со топлинска енергија, иако ЕСМ побара прогласување кризна состојба. Министерката за енергетика, Сања Божиновска, денеска на брифинг со новинарите порача дека државата има доволно резерви на мазут за да ги покрие потребите.

Барањето за кризна состојба ќе се разгледува на утрешната владина седница, но Божиновска нагласи дека тоа е технички чекор за да се активираат државните резерви. Причина за ова е триесетдневната неможност за редовна набавка на мазут од Грција поради тамошните протести.

„Нема да има никаква криза. Постои мазут во државата – ако не го земат од Грција, ЕСМ ќе го земе од државните резерви. За граѓаните ова нема да значи апсолутно ништо“, истакна министерката.