Интер ИКЕА Груп, глобалниот франшизер на брендот ИКЕА, соопшти дека во моментов не постојат конкретни планови за отворање продавници во Македонија, со што ги демантираше информациите што неодамна се појавија во дел од домашните медиуми за можен влез на компанијата на пазарот.

Од групацијата нагласуваат дека постојано ги анализираат можностите за проширување на ИКЕА концептот, како на постојните така и на нови пазари, со цел да бидат поблиску до што поголем број потрошувачи. Сепак, како што наведуваат, до овој момент не е донесена одлука за инвестирање и отворање продажни капацитети во Северна Македонија.

„Интер ИКЕА Груп континуирано ги разгледува можностите за раст, но заклучно со денес нема планови за отворање ИКЕА во Северна Македонија“, соопшти компанијата во официјална изјава.

Во регионот, ИКЕА веќе има воспоставена мрежа на продавници и е присутна во Хрватска, Словенија, Србија, Романија, Бугарија и Грција, што на македонските потрошувачи им овозможува пристап до брендот преку соседните пазари.

Цената на бакарот продолжува со силен нагорен тренд и се доближува до историското ниво од 12.000 долари за тон, заокружувајќи една исклучително турбулентна година на светските берзи. Пазарните движења се одвиваат во услови на засилени геополитички тензии, но и рекордна побарувачка за индустриски метали.

Податоците од Лондонската берза на метали покажуваат дека бакарот е на пат да го оствари најголемиот годишен раст од 2009 година наваму, што дополнително го зголемува интересот кај инвеститорите и индустриските потрошувачи.

Аналитичарите посочуваат дека растот е резултат на повеќе фактори. Глобалната понуда е ограничена, залихите се на ниско ниво, а рударското производство не успева да одговори на зголемената побарувачка. Истовремено, трговските тензии и неизвесноста на меѓународните пазари поттикнуваат забрзано купување на суровини.

Дополнителен притисок врз цената создава и забрзаната енергетска транзиција. Бакарот е еден од клучните метали за електричните возила, обновливите извори на енергија и модерната електроинфраструктура, што го прави незаменлив во процесот на декарбонизација.

Инвеститорите остануваат оптимисти и сметаат дека светската економија допрва влегува во долгорочен „супер-циклус“ на побарувачка на бакар, поттикнат од зелените политики и технолошките промени кои во голема мера зависат од овој метал.

Од 1 јануари електричната енергија ќе поскапи, откако Регулаторната комисија за енергетика донесе одлука за корекција на цените по тарифни блокови. Според одлуката, цената на струјата за домаќинствата ќе се зголеми за 2,45 проценти во првиот блок, 2,87 проценти во вториот, 3,32 проценти во третиот и 3,84 проценти во четвртиот блок, додека евтината тарифа ќе поскапи за 2,50 проценти.

Претседателот на Регулаторната комисија, Марко Бислимоски, истакна дека одобреното зголемување е значително пониско од барањето доставено од ЕВН Хоум, кое изнесувало од 7,6 до речиси 12 проценти, во зависност од блокот.

„Домаќинство кое троши 210 киловат часови во првиот блок и 227 киловат часови во евтина тарифа ќе има зголемување на месечната сметка од околу 57 денари, односно 2,28 проценти“, изјави Бислимоски.

Според податоците на Регулаторната комисија, околу 64 проценти од домаќинствата, или над 517.000 корисници, трошат струја исклучиво во првиот блок. За околу 170.000 домаќинства кои влегуваат и во вториот блок, зголемувањето ќе изнесува околу 70 денари месечно. Кај приближно 14.000 домаќинства кои користат и трет блок, сметките ќе бидат повисоки за околу 370 денари, додека кај околу 4.400 домаќинства со потрошувачка и во четвртиот блок, зголемувањето достигнува и до 900 денари месечно.

Бислимоски појасни дека надоместокот од 200 денари останува дел од сметките и нема да биде укинат, бидејќи анализите покажале дека во спротивно зголемувањето на цените по блокови би било значително поголемо.

Регулаторната комисија оцени дека тарифниот систем е применет, но дека во барањето не бил целосно почитуван принципот на урамнотежување на интересите меѓу енергетските компании и потрошувачите. Како што беше нагласено, целта на одлуката е да се избегне ценовен шок и да се заштитат граѓаните од нагло зголемување на трошоците за електрична енергија.