Швајцарија во моментов не располага со доволни капацитети за целосна заштита од масовни напади и неопходно е значително зголемување на вложувањата во одбраната, предупреди началникот на вооружените сили, генерал-потполковник Томас Сусли. Тој оценува дека безбедносните ризици во Европа се во пораст, особено поради однесувањето на Русија.
Во интервју за швајцарскиот весник „Ноје Цирихер Цајтунг“, Сусли истакнал дека државата е релативно подготвена за сајбер напади и закани кон критичната инфраструктура, но дека армијата се соочува со сериозен недостиг од соодветна воена опрема.
„Не сме способни да се одбраниме од закани што доаѓаат од далечина, ниту од напади од големи размери врз нашата територија. Во услови на вистинска вонредна состојба, само околу една третина од војниците би биле целосно опремени“, изјави Сусли, кој ја напушта функцијата на крајот од годинава.
Со цел надминување на овие слабости, Швајцарија започна процес на зголемување на одбранбениот буџет, модернизација на артилеријата и замена на старите борбени авиони со нови ловци „Ф-35А“ од американскиот производител „Локид Мартин“. И покрај тоа, овие мерки се соочуваат со критики, главно поради дополнителниот притисок врз државните финансии.
