Поранешниот извршен директор на американската компанија „Фибребонд“, со седиште во Луизијана, им исплатил на вработените бонуси во вкупен износ од 240 милиони долари по продажбата на компанијата за 1,7 милијарди долари, објави „Волстрит џурнал“.
Греам Вокер, кој во тој период ја извршувал функцијата извршен директор, одлучил 15 проценти од вредноста на продажбата да им бидат распределени на вработените, иако тие не поседувале сопственички удел во компанијата. Договорот за продажба бил постигнат претходно годинава, кога „Фибребонд“ беше преземена од корпорацијата „Итон“.
Бонусите се распределени меѓу 540 вработени со полно работно време, при што просечниот износ по работник изнесува околу 443.000 долари. Исплатата е планирана да се реализира во период од пет години, а вработените со подолг работен стаж добиле значително повисоки суми.
Вработените во јуни почнале да добиваат запечатени писма со детални информации за индивидуалните бонуси. Компанијата „Фибребонд“ е основана во 1982 година од Клод Вокер, таткото на Греам Вокер, и низ годините поминала низ интензивен раст, но и сериозни предизвици, меѓу кои големиот пожар во 1998 година и падот на побарувачката по пукањето на дот-ком балонот во раните 2000-ти.
