Стотици летови се откажани поради силната снежна бура што ги погоди Њујорк, Њу Џерси и голем дел од североисточните држави на Соединетите Американски Држави.
Според податоците на FlightAware, сервис за следење на воздушниот сообраќај, на ниво на целата земја се откажани 1.659 летови, што е речиси десеткратно зголемување во споредба со претходниот ден. Предупредувањето за зимска бура и понатаму е на сила, а во одредени подрачја се очекува и појава на замрзнат дожд.
Националната метеоролошка служба прогнозира снежна покривка до 13 сантиметри во Њујорк, додека во областите северно и североисточно од градот се очекуваат и до 28 сантиметри снег. Локалните власти апелираат граѓаните да ги одложат непотребните патувања и да останат во своите домови доколку имаат можност.
Според медиумските информации, оваа бура може да донесе најобилни снежни врнежи во Њујорк во последните три години. Покрај аеродромите во Њујорк и Њу Џерси, откажувања на летови се регистрирани и во Филаделфија, Балтимор, како и во Торонто, најголемиот деловен центар во Канада.
