Претседателот на Србија, Александар Вучиќ, најави отворање фабрики за производство на дронови во земјата, во соработка со, како што рече, „голема странска сила“. Изјавата ја даде при поставувањето камен-темелник за новата зграда на Министерството за одбрана и Генералштабот на Војската на Србија во касарната „Бањица“ во Белград.
Вучиќ истакна дека во наредниот период ќе се работи на зголемување на пополнетоста и јакнење на специјалните единици, со цел нивната оперативност да надмине 95 проценти. Според него, донесена е одлука не само за целосна пополнетост, туку и за зголемување на бројот на припадници и подигање на критериумите за прием.
Покрај специјалните единици, најавено е и значително зајакнување на тенковските, артилериските и ракетните капацитети, како и дополнителни инвестиции во воздухопловството и воздушната одбрана. Претседателот нагласи дека Србија веќе располага со значителен број дронови и дека јавноста би се изненадила од нивната количина.
„Кон крајот на март или почетокот на април очекувам отворање на голема фабрика за производство на високософистицирани дронови во Србија. Тоа е проект што го реализираме со силен странски партнер“, изјави Вучиќ.
Тој додаде дека Србија набавува нова и слоевита опрема за воздушна одбрана, оценувајќи дека мал број армии располагаат со толку моќен систем. На крајот, Вучиќ порача дека државата мора самостојно да ја гарантира сопствената безбедност, нагласувајќи дека новите објекти на Министерството за одбрана и Генералштабот треба да бидат гордост на земјата.
