Панелинскиот музички сојуз остро ја осуди, како што ја нарече, неприфатливата постапка на градоначалникот на Лерин, кој предводел група „револтирани граѓани“ и предизвикал тензии за време на концерт на традиционална музика поради изведување песни на словенски дијалект.
Според пријава на музичкиот состав „Banda Entopica“, градоначалникот директно интервенирал кај тон-мајсторот, барајќи да се исклучи озвучувањето, додека друго лице се искачило на сцената и физички оттурнало член на бендот со зборовите дека „такви песни тука нема да се свират“.
Од Сојузот оценуваат дека ваквите настани се дел од долгорочна политика на забрана и маргинализација на јазикот, песните, обичаите и културата на малцинствата во Грција, и покрај официјалните декларации за почит и инклузивност. Во соопштението се наведува дека преку културата се поттикнува омраза меѓу народите врз основа на јазик, религија и културна припадност.
Панелинскиот музички сојуз предупредува дека на удар не е само словенскиот јазик, туку и арапскиот, албанскиот, турскиот, како и различните верски заедници, особено муслиманската, кои често се стигматизираат.
На крајот, музичарите и граѓаните се повикуваат да се спротивстават на политиките што шират поделби и омраза, со порака дека народите немаат ништо што ги разделува и дека заедничката борба е единствениот пат кон мир, без војни, сиромаштија и експлоатација.
