Во Тетово започна инсталацијата на камери од системот „Безбеден град“, со што градот за првпат добива ваков вид на сеопфатен видео-надзор на јавните сообраќајници.
Камерите веќе се поставуваат на повеќе улици и булевари, а активностите се одвиваат во последните неколку дена.
Станува збор за дел од државниот проект „Безбеден град“, кој има за цел подобрување на безбедноста во сообраќајот, поголема контрола и превенција на сообраќајни прекршоци, како и зголемување на општото чувство на сигурност кај граѓаните.
Досега, Тетово немаше поставени вакви камери на градските улици, а со нивното воведување се очекува подобро регулирање на сообраќајот и поефикасна реакција на надлежните институции во случај на прекршоци или инциденти.
Системот „Безбеден град“ веќе функционира во други градови низ државата, каде што, според надлежните, придонел за намалување на бројот на сообраќајни незгоди и поголема дисциплина кај возачите.
Инсталацијата на камерите во Тетово ќе продолжи и во наредниот период, при што ќе бидат опфатени клучни сообраќајни точки, крстосници и фреквентни булевари.
Од институциите најавуваат дека јавноста ќе биде навремено информирана за целосното ставање на системот во функција, како и за начинот на неговото користење во согласност со законските прописи.
