Според најновите прогнози на Меѓународната агенција за енергија (ИЕА), светскиот пазар на нафта би можел да се соочи со значително пренасочување веќе во 2026 година. Агенцијата предупредува дека понудата би можела да ја надмине побарувачката за речиси 4 милиони барели дневно, што најавува нови предизвици за цените на „црното злато“.
Оваа вест доаѓа по година во која цените на нафтата бележат пад од околу 20%, а анализите на експертите најавуваат дека, ако состојбите останат непроменети до крајот на 2025 година, оваа година ќе заврши со најголем пад на цените од 2020-та.
На лондонскиот пазар барелот се тргуваше за 60,64 долари, што е пораст од само 0,2%, додека во САД цената се искачи за 0,1%, на 56,74 долари. И покрај зголеменото производство на ОПЕК и нејзините партнери, побарувачката од најголемите економии на светот не го достигнува очекуваното ниво, што дополнително го притиска пазарот.
Експертите објаснуваат дека единствената поддршка за цените доаѓа од геополитичките тензии, како што е блокадата на испораките од Венецуела, но таа е краткорочна и не може да ја надомести прекумерната понуда. Дополнителен притисок би можел да предизвика евентуален договор за прекин на конфликтот меѓу Русија и Украина, што би овозможило повторно враќање на руската нафта на светските пазари.
Со вакви трендови, аналитичарите предупредуваат дека цените на нафтата можат да останат под притисок и во иднина, што го прави следниот период критичен за глобалниот енергетски пазар.
