Шефот на кабинетот на германскиот канцелар, Торстен Фрај, изјави дека возраста за пензионирање треба да се прилагоди според годините на уплатени придонеси и природата на професијата. „Не секој може да работи исто време, а постојат занимања каде физичките или менталните ограничувања доаѓаат порано“, рече Фрај за Редакциската мрежа Германија (RND).
Тој нагласи дека сегашниот пензиски систем не е одржлив, бидејќи во 1960-тите еден пензионер се покривал со придонеси од околу шест вработени, додека денес има само двајца вработени за еден пензионер, а просечната пензија трае најмалку 20 години. „Социјалните трошоци растат побрзо од економската сила, што е спротивно на социјалната кохезија“, истакна Фрај.
Според него, државата мора да реагира, иначе придонесите за социјално осигурување ќе се зголемат од сегашните околу 42 проценти на над 48 проценти во наредните години. Пензиската комисија треба до летото да предложи модели за идниот пензиски систем, вклучително и разгледување на индивидуализација на возраста за заминување во пензија.
