Министерот за здравство, Азир Алиу, најави револуција во инфраструктурата на Клиничкиот центар „Мајка Тереза“ во Скопје. До мај, според него, граѓаните ќе добијат целосно нов паркинг со „паметна“ технологија и повеќекатна гаража, со што ќе се реши долгогодишниот административен проблем што ја попречувал неговата функционалност.
Но, инфраструктурата е само дел од планот. Во соработка со министерството за образование и наука, се подготвува национална децениска стратегија за формирање на здравствени професионалци – од доктори до медицински сестри – онаму каде што навистина постои потреба. „Не може да се постигне преку ноќ. За да се формира профил на доктор ни се потребни најмалку шест години“, изјави Алиу по посетата на обновената Клиника за гинекологија и акушерство.
Министерот најави и значително зајакнување на теренската здравствена служба. Во соработка со владата, се планира набавка на 100 нови амбулантни возила, а веќе во 2027 година ќе следат уште 50. „Вкупно 150 модерни и опремени амбулантни возила што ќе им служат на граѓаните“, потенцира Алиу, ветувајќи поголема достапност и квалитет во здравствената услуга.
