Од почетокот на 2026 година, сопствениците на постари автомобили во Брисел ќе мора да бараат алтернативи за своето секојдневно движење – градот воведува строга забрана за возила кои не ги исполнуваат новите еколошки стандарди. Според Регионалната агенција за животна средина, дизел возилата со Еуро 5 и бензинските автомобили со Еуро 2 повеќе нема да можат да влегуваат во градскиот регион.
Сопствениците на возилата кои ќе го прекршат правилото ќе добијат предупредувачко писмо, а доколку истата забрана ја нарушат двапати во рок од три месеци, ќе бидат казнети со 350 евра.
Оваа мерка е дел од стратегијата на Брисел за чист воздух, позната како ЛЕЗ (Low Emission Zone), која се воведува постепено. Иако Регионалниот парламент претходно одложи стапување во сила на забраната, Уставниот суд на Белгија ја поништи таа одлука и ја врати мерката на сила.
Забраната не се однесува само на автомобили – и мотоциклите со стандард Еуро 1 и Еуро 2 ќе бидат опфатени. Според агенцијата, околу 33.000 возила, или околу седум проценти од сите регистрирани возила во Брисел, ќе бидат погодени од првата фаза на ЛЕЗ.
Следната фаза е закажана за 1 јануари 2028 година, кога во градот ќе биде забрането движење и на дизел возилата со Еуро 6 и бензинските со Еуро 3, што значи дополнителен удар за сопствениците на постари автомобили.
