Новиот селектор на фудбалската А репрезентација на Македонија, Гоце Седлоски, официјално ги претстави соработниците со кои ќе ја води националната селекција во претстојниот период.
Дел од стручниот штаб како асистенти ќе бидат Борче Христов, актуелен шеф на стручниот штаб на ФК Тиквеш и директор на Центарот за едукација, Ерхан Селими, досегашен селектор на репрезентацијата до 19 години, како и Зоран Бошковски – Чоко, легендарен македонски фудбалер и стрелец на првиот гол во историјата на националниот тим.
Во тимот се приклучува и поранешниот репрезентативец Ванче Шиков, кој зад себе има 58 настапи за Македонија, додека за работата со голманите ќе биде задолжен Гого Јовчев.
За видео-аналитичар на А репрезентацијата е ангажиран Мартин Христов, а селекторот Седлоски најави дека дополнително ќе го објави и името на кондицискиот тренер кој ќе се приклучи на стручниот штаб.
Со ваквиот избор на соработници, новиот селектор формира тим од искусни и докажани професионалци, со фокус на стабилност, континуитет и понатамошен напредок на македонската фудбалска репрезентација.
