Собранието денеска на седница го изгласа новиот Закон за Судски совет, со 73 гласа „за“ и еден „воздржан“. Со него се предвидуваат значајни промени во работењето на ова тело, насочени кон поголема транспарентност, одговорност и ефикасност.
Според законските измени, се воведува јавност во постапката за разрешување на претседателот на Судскиот совет, а критериумите за избор на „истакнат правник“ се прецизираат. Исто така, јавни расправи ќе има при изборот на не-судски членови, што се очекува да го зајакне јавниот увид и довербата во процесот.
Законските промени предвидуваат и посилни критериуми за избор, одговорност и разрешување на судиските членови на Советот, како и појасна постапка за дисциплинска одговорност – не само на судиите, туку и на самите членови на Советот. Новина е обврската одлуките за избор и оценка на одговорноста на судиите да бидат јасно образложени и индивидуализирани, како и воспоставување рокови за дисциплинските постапки и дефинирање на постапката за жалби против одлуките на Советот.
Според властите, законот е донесен во согласност со препораките на Европската унија, со цел да се зајакне довербата во судскиот систем и да се унапреди целокупната правна рамка во земјата.
