Пет нови електрични локомотиви, набавени со заем од ЕБРД, ќе го трансформираат железничкиот транспорт во земјата, најави вицепремиерот и министер за транспорт Александар Николоски. Договорот за заемот денеска го потпишаа Николоски, министерката за финансии Гордана Димитриеска-Кочоска и директорот на МЖ Транспорт, Дејан Кошутиќ.
„Со новите пет локомотиви, комбинирани со четирите понови од постојната флота, ќе имаме девет модерни машини кои целосно ќе го покријат карго-превозот, а дел од нив ќе се користат и за патнички линии“, изјави Николоски. Тој додаде дека од вкупно 11 локомотиви, седум се постари и дека новата инвестиција значително ќе ја подобри ефикасноста на транспортот.
Министерот потенцира дека модернизацијата на железничката флота е особено важна за Коридорот 10, кој се очекува да бележи раст, како и за Коридорот 8, каде се вложуваат значајни средства во инфраструктурата.
Воедно, набавката на новите електрични локомотиви е дел од пошироката стратегија за подобрување на квалитетот на воздухот во Скопје преку воведување на градски електричен воз. „Во моментов се работи на првата од три линии, а во следните две години ќе се завршат и останатите. Целта е сите линии да функционираат со електрични возови, со што целосно ќе се елиминира употребата на дизел и ќе се придонесе за почист воздух во главниот град“, рече Николоски.
Тој најави дека следниот чекор е објавување на повикот за набавка на локомотивите, кој се очекува да се реализира до март, во соработка со ЕБРД, по што ќе започне испораката на новата флота.
