Државната комисија за спречување на корупцијата (ДКСК) во 2026 година ќе го следи имотниот статус на 60 високи функционери, соопшти претседателот на Комисијата, Адем Чучуљ. Меѓу нив се десет судии, десет јавни обвинители, десет пратеници, десет министри, десет градоначалници и десет лица на кои во 2025 година им престанала функцијата градоначалник. Имињата на функционерите ќе бидат утврдени во јануари следната година.
На денешната 26. седница, ДКСК го усвои Годишниот план за следење на имотната состојба и судирот на интереси за 2026 година. Чучуљ посочи дека планот е подготвен врз основа на препораките на Европската комисија и анализа на ризиците од корупција, при што се земени предвид и претходните годишни планови и Националната стратегија за спречување на корупцијата и судирот на интереси за периодот 2021-2025 и 2026-2030 година.
„Имајќи ги предвид препораките од Европската комисија, предлагаме да се зголеми бројот на функционери опфатени во следењето на имотната состојба и судирот на интереси на 60 лица“, изјави Чучуљ. Тој појасни дека постапката ќе се базира на податоците од електронската база на податоци и ќе ги опфати сегашните и поранешните функционери.
Покрај следењето на имотната состојба, ДКСК ја усвои и Програмата за работа за 2026 година, која опфаќа и спроведување антикорупциска проверка на легислативата. Проверката ќе се врши на дел од законите кои не биле завршени во претходниот период, вклучително законот за лобирање, законот за локална самоуправа, законот за вештачење, законот за финансирање на политички партии, правилникот за доделување лиценци за здравствените работници со високо образование и законот за заштита на културното наследство.
На седницата беше донесена и одлука за укинување на Упатството за рангирање на предметите за постапување по пријави, со цел да се елиминира субјективноста во рангирањето и да се регулира начинот на постапување по предметите.
Чучуљ нагласи дека ДКСК добива голем број пријави, дел од кои се паушални и надвор од надлежноста на Комисијата, па укинувањето на упатството ќе обезбеди појасни правила и транспарентност во постапувањето.
