Во италијанскиот град Перуџа се случи брутален инцидент меѓу две групи имигранти, Македонци и Албанци, што предизвика паника во локалната заедница. Инцидентот се одвивал во кафе-бар во регионот „Сан Систо“ и ескалирал во хаос на улиците, при што неколку лица се повредени, а 11 други се уапсени.
Според прелиминарните информации од истрагата, конфликтот започнал ненадејно кога едно лице се фотографирало со мобилен телефон, што довело до вербална расправија. Таа брзо прераснала во масовна тепачка со употреба на столови, маси и стапови долги над 60 сантиметри. Во инцидентот биле вклучени и неколку романски државјани.
Ситуацијата дополнително се влошила кога двајца учесници, обидувајќи се да избегнат одговорност, со автомобил удриле во македонски државјанин, предизвикувајќи сериозни скршеници на двете нозе. Повредениот бил хоспитализиран во болницата во Перуџа.
Локалната полиција сè уште го истражува случајот, со посебен фокус на возачот и патниците во автомобилот, меѓу кои има и малолетно лице. Уапсените се на возраст меѓу 19 и 31 година, а дел од нив им се познати на властите.
