Општина Битола одлучи дека на прославата за дочекот на Новата година нема да има огномет. Со ова, Битола се приклучува кон другите општини кои ги уважуваат барањата на поедини здруженија на граѓани за помирна и побезбедна прослава.
Организираниот дочек, како и изминатите години, ќе се одржи на платото на Офицерскиот дом, во рамки на програмата „Зимска приказна“. Дневната програма на 31 декември започнува во 11:00 часот на платото на Офицерскиот дом, а од 12:00 часот активностите продолжуваат во Старата чаршија.
Вечерната програма пред Офицерскиот дом започнува во 20:30 часот со настап на Борче Наумовски, следи „Кабаре за раѓањето и вечноста“, потоа „Баркод бенд“, а од 23:00 до 1:00 часот по полноќ ќе настапи групата „Нокаут“.
