Во Основниот суд во Штип денеска започна судењето на Стојанче Зарков – Грофот, кој е обвинет за убиство на својата 84-годишна мајка на 8 август. Судењето беше одложувано двапати, а денешното рочиште беше прво по тие одложувања.
Обвинителката Тања Кацарова од Основното јавно обвинителство-Штип побара најстрога затворска казна, оценувајќи го делото како длабока повреда на општествените и морални вредности. Таа истакна дека насилниот чин од страна на најблискиот член на семејството, родениот син, оставил трајни последици не само во семејството, туку и во општеството во целина.
Бранителот на обвинетиот, Донче Стаменков, кој е определен по службена должност, тврди дека Зарков нема мотив и умисла за убиство и побара ослободителна пресуда. „Сите докази доставени од Обвинителството се контрадикторни и не можат да ја докажат вината на обвинетиот“, рече Стаменков.
Обвинетиот даде исказ пред судот и посочи дека не се сеќава на настанот. Според обвинението, околу два часот по полноќ на 8 август, Зарков со нож ја усмртил својата мајка, а потоа самиот го пријавил случајот кај надлежните органи.
