Од Флорида стигнаа остри пораки што одекнаа далеку над Блискиот Исток. На средбата со израелскиот премиер Бенјамин Нетанјаху, Доналд Трамп јасно стави до знаење дека трпението на САД е при крај – и кон Хамас, и кон Иран.
Американскиот претседател предупреди дека Хамас мора без одлагање да се разоружа, во спротивно ќе се соочи со „висока цена“. Според Трамп, втората фаза од мировниот план за Газа може да започне „што е можно побрзо“, но само доколку палестинската група го положи оружјето и ги исполни преземените обврски. Во тој случај, како што најави, обновата на разурнатата Газа би почнала речиси веднаш.
Иако израелската армија и понатаму изведува повремени напади во Појасот Газа, Трамп инсистира дека Израел целосно стои зад мировниот план, кој веќе се спроведува од октомври. Сепак, процесот е заглавен – Хамас сè уште не го предал телото на еден израелски заложник, што дополнително ја комплицира транзицијата кон следната фаза.
Втората етапа од планот предвидува длабоки промени: формирање технократска власт во Газа, целосно разоружување на Хамас и повлекување на израелските сили, по што би следела обемна реконструкција на територијата.
Но, пораките од Трамп не завршија со Газа. Тој испрати и јасно предупредување до Техеран, нагласувајќи дека САД ќе поддржат нови напади врз Иран доколку земјата продолжи со развој на балистички ракети и нуклеарна програма. Според него, постојат индикации дека Иран можеби користи нови, досега неоткриени локации за нуклеарни активности.
„Ако се обидуваат да градат нови постројки, нема да имаме избор. Ќе мора да ги уништиме“, изјави Трамп, потсетувајќи на нападите што САД ги изведоа летоска.
Одговорот од Техеран беше брз. Али Шамкани, главниот политички советник на иранскиот врховен водач, порача дека Иран е подготвен да се брани и дека секоја агресија ќе биде дочекана со жесток одговор.
Со овие изјави, Трамп повторно ја подигна реториката на високо ниво, ставајќи до знаење дека мировните процеси и безбедносните прашања на Блискиот Исток ќе се движат меѓу дипломатијата и заканата од нови воени судири.
