На денешната редовна 140-та седница, Владата го усвои новиот Закон за јавно обвинителство, еден од клучните столбови на реформската агенда во Област 5 – Фундаментални вредности, со акцент на владеење на правото. Со овој потег, државата прави значаен исчекор кон градење на силно и транспарентно обвинителство, како гарант за заштита на јавниот интерес.
Законот е плод на детална анализа, консултации и усогласување со европските стандарди и најдобрите меѓународни практики, што ја зацврстува позицијата на јавното обвинителство како независна и професионална институција.
Една од најзначајните новини во законот е измената на процедурата за избор на Јавен обвинител на Република Северна Македонија. Сега критериумите за избор се јасно дефинирани, а процесот е транспарентен, мерит-базиран и ослободен од политички влијанија. Со тоа се обезбедува дека најквалитетните кандидати ќе бидат избрани исклучиво според стручност, интегритет и професионален кредибилитет.
Законот исто така воведува обврзувачки рокови за избор и унапредување на обвинителите, како и принцип на категоризација на дисциплинска одговорност. Овие мерки носат поголема предвидливост, функционалност и одговорност во работењето на обвинителството, што директно ја зголемува довербата на граѓаните во институциите.
„Усвојувањето на овој закон е конкретен доказ за нашата определба да градиме независни, професионални и силни институции кои се во служба на граѓаните и владеењето на правото“, изјавија од Владата, нагласувајќи дека реформите во правосудството остануваат еден од највисоките приоритети на државата во процесот на евроинтеграција.
Со новиот Закон за јавно обвинителство, државата прави голем чекор кон правосудство кое е транспарентно, одговорно и непристрасно – клучен предуслов за стабилност, развој и доверба на граѓаните.
