Државниот пазарен инспекторат во текот на декември спроведе обемна акција за контрола на угостителските објекти на територијата на целата држава, со акцент на почитувањето на Законот за угостителска дејност и Законот за заштита од пушењето.
Според официјалниот биланс, инспекторите извршиле вкупно 542 надзори, при што биле издадени 96 прекршочни налози во вкупна вредност од 2.823.870 денари, односно околу 45 илјади евра. Поради утврдени неправилности, на 26 угостителски објекти им била изречена мерка забрана за вршење дејност.
Од Државниот пазарен инспекторат информираат дека засилените контроли ќе продолжат и во периодот на новогодишните и божиќните празници. Воедно, упатија апел до угостителите доследно да ги почитуваат законските обврски за работа и целосната забрана за пушење во затворени простории, потенцирајќи дека инспекциските служби нема да прават отстапки кога е во прашање заштитата на јавниот интерес.
