Регионалната економија на Адрија ја затвора 2025 година со солидна кондиција, и покрај глобалните неизвесности. Според најновата макроекономска анализа на „Блумберг Адрија“, моторот на растот сè уште го држат внатрешните фактори – засилената домашна потрошувачка, континуираниот раст на платите и стабилните пазари на труд. За разлика од тоа, извозната побарувачка и инвестициската активност покажуваат нерамномерна динамика, што укажува на посложена надворешна средина.
Во однос на Македонија, аналитичарите предвидуваат економски раст од околу 3 отсто во 2025 година. Во 2026 година се очекува благо забавување, со стапка од приближно 2,9 проценти, како резултат на постепеното смирување на силниот инвестициски циклус. Истовремено, инфлаторните притисоци остануваат присутни. Годишната инфлација во ноември 2025 година се проценува на околу 4 проценти, а слично ниво се очекува да се задржи и во текот на 2025 и 2026 година, што укажува дека ценовната стабилизација ќе оди поспоро од очекуваното.
