Голем дел од московскиот регион вечерва остана без електрична енергија по сериозен дефект во енергетската мрежа, за кој руските власти тврдат дека е поврзан со напади од украински беспилотни летала врз критичната инфраструктура во поширокото подрачје на Москва.
Според официјалните податоци, без струја останале најмалку 100.000 жители, додека неофицијални информации објавени од украинската агенција UNN и руски Телеграм-канали говорат за значително поголем број погодени корисници – од 500.000 до 600.000.
Жителите на повеќе населени места пријавиле дека непосредно пред прекинот слушнале звуци од дронови, по што електричната енергија била исклучена во градовите Жуковски, Литкарино и Раменское. Од локалната администрација во округот Раменское соопштија дека дошло до дефект во трафостаницата „Донино“, каде што изгорела електрична шина, но засега нема официјална потврда дека причината е директен напад.
Руското Министерство за одбрана информира дека во период од четири часа системите за противвоздушна одбрана собориле вкупно 109 украински беспилотни летала, дел од нив и во близина на Москва. Градоначалникот Сергеј Собјанин изјави дека безбедносните служби реагирале навреме и дека сите закани биле неутрализирани.
Надлежните институции уверуваат дека состојбата е под контрола и дека екипите интензивно работат на целосно обновување на снабдувањето со електрична енергија. Настанот повторно го насочи вниманието кон ранливоста на енергетската инфраструктура и растечката безбедносна неизвесност поврзана со војната во Украина.
